لاہور: لاہور ہائی کورٹ نے رکن قومی اسمبلی جمشید دستی کی نااہلی کے خلاف دائر درخواست پر تحریری حکم نامہ جاری کر دیا ہے۔
چیف جسٹس عالیہ نیلم کی سربراہی میں تین رکنی بینچ نے گزشتہ سماعت کا تحریری حکم جاری کیا، جس کے مطابق عدالت نے این اے 175 مظفر گڑھ کے انتخابی شیڈول کو معطل کر دیا ہے۔ عدالت نے 14 جولائی کو الیکشن کمیشن کی جانب سے جاری نوٹی فکیشن بھی معطل کر دیا۔ تحریری حکم نامے میں کہا گیا ہے کہ درخواست میں اہم قانونی نکات اٹھائے گئے ہیں، جن میں الیکشن کمیشن کے فیصلے اور عدالتی دائرہ اختیار کا معاملہ شامل ہے۔ عدالت نے الیکشن کمیشن اور اٹارنی جنرل کو نوٹسز جاری کر دیے ہیں۔
عدالت نے جمشید دستی کی درخواست پر مزید سماعت کے لیے 10 ستمبر کی تاریخ مقرر کی ہے۔ واضح رہے کہ الیکشن کمیشن آف پاکستان نے جمشید دستی کی تعلیمی اسناد کو جعلی قرار دیتے ہوئے ان کی نااہلی کے دو ریفرنسز منظور کیے تھے، جو اسپیکر قومی اسمبلی کی جانب سے بھیجے گئے تھے۔
تازہ ترین خبروں کے لیے پی این آئی کا فیس بک پیج فالو کریں
