مفتاح اسماعیل کا لیگی رہنماؤں کے الزامات پر قانونی کارروائی کا اعلان

عوام پاکستان پارٹی کے رہنما اور سابق وزیر خزانہ مفتاح اسماعیل نے مسلم لیگ (ن) کے رہنماؤں کی جانب سے عائد کیے گئے الزامات پر قانونی کارروائی کرنے کا اعلان کیا ہے۔

کراچی میں پریس کانفرنس کرتے ہوئے مفتاح اسماعیل نے کہا کہ ن لیگ کے ایک سینیٹر اور رکن قومی اسمبلی نے ان پر بے بنیاد الزامات لگائے ہیں۔ اگر ان الزامات میں کوئی سچائی ہے تو ثبوت پیش کیے جائیں۔ ان کا کہنا تھا کہ جس منصوبے کا ذکر کیا جا رہا ہے، اس سے ان کا کوئی تعلق نہیں کیونکہ یہ معاملہ 2019 کا ہے جب وہ جیل میں تھے۔

مفتاح اسماعیل نے الزام لگایا کہ وزیراعظم شہباز شریف کے بیٹوں کی دو شوگر ملز ہیں اور چینی کی برآمد جان بوجھ کر کرائی گئی۔ ان کے بقول اصل مسئلہ چینی کا نہیں بلکہ سیاسی مصلحتوں کا ہے۔ انہوں نے مزید کہا کہ اگر اس معاملے میں وہ قصوروار ہیں تو اسحاق ڈار اور محمد اورنگزیب بھی اتنے ہی ذمہ دار ہیں۔

انہوں نے نشاندہی کی کہ پہلی مرتبہ وزیر خارجہ اسحاق ڈار کو شوگر ایڈوائزری بورڈ کا چیئرمین بنایا گیا، جو خود ایک سوالیہ نشان ہے۔ مفتاح اسماعیل نے مطالبہ کیا کہ مسلم لیگ (ن) کے رہنما طارق فضل چوہدری اپنے جھوٹے الزامات پر معافی مانگیں، بصورت دیگر انہیں قانونی نوٹس بھیجا جائے گا۔