اسلام آباد: پاکستان نے اسرائیلی پارلیمنٹ کی جانب سے مقبوضہ مغربی کنارے پر خودمختاری کے متنازع اقدام کی شدید مذمت کی ہے۔
ترجمان دفتر خارجہ نے اپنے بیان میں کہا ہے کہ اسرائیلی پارلیمنٹ کا یہ اقدام بین الاقوامی قوانین کی کھلی خلاف ورزی ہے۔ اسرائیل مسلسل فلسطینی عوام کے بنیادی حقوق کو پامال کر رہا ہے، اور اس کے یکطرفہ اقدامات نہ صرف امن کے لیے کی جانے والی کوششوں کو نقصان پہنچا رہے ہیں بلکہ پورے خطے کے استحکام کے لیے بھی سنگین خطرہ ہیں۔
دفتر خارجہ نے عالمی برادری سے مطالبہ کیا کہ وہ اسرائیل کو ان غیر قانونی اقدامات پر جوابدہ بنائے، کیونکہ ایسے اقدامات فلسطین کی قانونی حیثیت کو تبدیل نہیں کر سکتے۔ بیان میں مزید کہا گیا ہے کہ پاکستان ایک آزاد، خودمختار فلسطینی ریاست کے قیام کو مسئلہ فلسطین کا واحد پائیدار حل سمجھتا ہے، اور فلسطینی عوام کے حقِ خودارادیت کی مکمل حمایت کرتا ہے۔ واضح رہے کہ گزشتہ روز اسرائیلی پارلیمنٹ نے مغربی کنارے پر قبضے کی متنازع قرارداد منظور کی تھی، جس پر عالمی سطح پر شدید ردِعمل سامنے آ رہا ہے۔
تازہ ترین خبروں کے لیے پی این آئی کا فیس بک پیج فالو کریں
