راولپنڈی: تحریک انصاف کے رہنما بیرسٹر سلمان اکرم راجا نے واضح کیا ہے کہ یہ مفروضہ ہے کہ شاہ محمود قریشی پارٹی کی قیادت کریں گے، پارٹی کے اصل لیڈر بانی پی ٹی آئی ہی ہیں۔
اڈیالہ جیل کے باہر میڈیا سے گفتگو کرتے ہوئے سلمان اکرم راجا نے کہا کہ شاہ محمود قریشی کے خلاف 8 سے 9 مقدمات زیرِ سماعت ہیں، جبکہ وہ مزید 8 مقدمات میں گرفتار بھی ہیں، اس لیے ان کی پارٹی قیادت کی بات درست نہیں۔ انہوں نے کہا کہ قریشی صاحب کا عہدہ اپنی جگہ قائم ہے، مگر قیادت کا سوال ہی پیدا نہیں ہوتا۔ سلمان اکرم راجا نے مزید کہا کہ ہم صبح دس بجے سے جیل کے باہر موجود ہیں مگر اب تک اندر جانے کی اجازت نہیں ملی، حالانکہ آج توشہ خانہ ٹو کیس کی سماعت ہو رہی ہے۔
ان کا کہنا تھا کہ اسلام آباد ہائی کورٹ کے احکامات کے مطابق فیملی اور وکلا کو سماعت میں شریک ہونے کا حق ہے، لیکن یہاں وکلا کو باہر بٹھایا گیا ہے جبکہ اندر ٹرائل جاری ہے، جو آئین کے تقاضوں کی خلاف ورزی ہے۔ انہوں نے بند کمرے میں ٹرائل پر شدید اعتراض کرتے ہوئے کہا کہ آئین اور قانون کی دھجیاں اڑائی جا رہی ہیں، یہ ٹرائل غیر آئینی اور غیر قانونی ہے، جسے کالعدم قرار دیا جانا چاہیے۔
تازہ ترین خبروں کے لیے پی این آئی کا فیس بک پیج فالو کریں
