اہم سیاسی جماعت کو بڑا دھچکہ، ن لیگ نے بڑی وکٹ اڑا لی

خیبرپختونخوا کی سیاست میں اہم پیش رفت سامنے آئی ہے،

عوامی نیشنل پارٹی (اے این پی) کو بڑا دھچکہ لگا ہے۔ اے این پی کی سینئر رہنما اور سابق رکن خیبرپختونخوا اسمبلی ثمر ہارون بلور نے مسلم لیگ ن میں باضابطہ شمولیت اختیار کرلی ہے۔ جماعت کی سینئر رہنما اور شہید رہنما ہارون بشیر بلور کی بیوہ، ثمر ہارون بلور نے مسلم لیگ (ن) میں شمولیت کا فیصلہ کیا تھا۔

اس اہم ملاقات میں مسلم لیگ ن کے سینئر رہنما امیر مقام، وفاقی وزیر داخلہ رانا ثناء اللہ اور ڈپٹی اسپیکر قومی اسمبلی مرتضیٰ جاوید عباسی بھی شریک تھے۔ ملاقات کے دوران ثمر ہارون بلور کو مسلم لیگ ن کی جانب سے مخصوص نشست کا پارٹی ٹکٹ بھی دے دیا گیا ہے۔

پشاور میں میڈیا سے گفتگو کرتے ہوئے ثمر ہارون بلور نے کہا تھا کہ وہ مسلم لیگ (ن) کا حصہ بننے جا رہی ہیں اور اس حوالے سے آج وزیراعظم شہباز شریف سے ملاقات کریں گی۔

ثمر ہارون بلور اے این پی کی صوبائی سیکرٹری اطلاعات کے طور پر خدمات انجام دے چکی ہیں، جب کہ وہ خیبرپختونخوا اسمبلی کی رکن بھی رہ چکی ہیں۔ ان کا شمار اے این پی کی فعال اور متحرک خواتین رہنماؤں میں ہوتا تھا۔

ان کی شمولیت کو مسلم لیگ (ن) کے لیے ایک اہم سیاسی کامیابی قرار دیا جا رہا ہے، خاص طور پر خیبرپختونخوا میں جہاں جماعت اپنی سیاسی پوزیشن مستحکم کرنے کی کوششوں میں ہے۔

یاد رہے کہ ثمر ہارون بلور کے شوہر، ہارون بشیر بلور، جولائی 2018 میں ایک خودکش دھماکے میں شہید ہو گئے تھے، جس کے بعد ثمر بلور نے نہ صرف ان کا سیاسی مشن جاری رکھا بلکہ عوامی حمایت بھی حاصل کی۔