فتنہ الہندوستان کے دہشتگردوں کے ذریعے کراچی اور گوادر پورٹ کو نقصان پہنچانے کی آڈیو منظر عام پر آگئی۔
وزیر اعلیٰ بلوچستان سرفراز بگٹی کی پریس کانفرنس کے دوران فتنہ الہندوستان کے دہشتگردوں کی آڈیو چلائی گئی جس میں بھارتی اسپانسرڈ دہشتگرد بن قاسم اور کراچی پورٹ پر حملے کی منصوبہ بندی کر رہے ہیں۔
آڈیو میں دہشتگرد بھارتی خفیہ ایجنسی ’را‘ ہینڈلر کو ’استاد‘ کے نام سے مخاطب کر رہے ہیں۔
سرفراز بگٹی نے بتایا کہ بھارت نے اپنی پراکسیز کے ذریعے نئی سازش شروع کی ہے، بھارت پاکستان بالخصوص بلوچستان میں دہشتگردی کی نئی لہر لانا چاہتا ہے، را کی جانب سے فتنہ الہندوستان کے دہشتگردوں کو اہداف دیے گئے ہیں۔
انہوں نے بتایا کہ فتنہ الہندوستان کی آڈیو کلپ میں کراچی اور گوادر پورٹ پر حملے کی گفتگو کی گئی، اس میں را ہینڈلرز کیلیے استاد کا لفظ استعمال کیا گیا، فتنہ الہندوستان کا ہدف پاکستان کی ابھرتی معیشت کو نقصان پہنچانا ہے۔
ان کا کہنا تھا کہ بلوچستان میں کسی بڑے فوجی آپریشن کی ضرورت نہیں، مسنگ پرسنز معاملے کو ریاست کے خلاف پراپیگنڈے کے طور پر استعمال کیا گیا، مسنگ پرسنز کے حوالے سے قانون سازی کی گئی ہے، سیاسی جماعتوں سے ہمیشہ بات ہو سکتی ہے۔
تازہ ترین خبروں کے لیے پی این آئی کا فیس بک پیج فالو کریں
