گرینڈ ڈیموکریٹک الائنس (جی ڈی اے) نے این اے 213 عمرکوٹ کا ضمنی الیکشن پاکستان تحریک انصاف (پی ٹی آئی) کے ساتھ مل کر لڑنے کا اعلان کر دیا، پیر صدر الدین شاہ راشدی نے کہا، لال مالہی ہمارے مشترکہ امیدار ہونگے۔
جی ڈی اے سندھ کے چیف کوآرڈینیٹر سید صدرالدین شاہ راشدی، ڈاکٹر صفدر عباسی، غلام مرتضی جتوئی، حلیم عادل شیخ، ریاض چانڈیو، منیر حیدر شاہ اور دیگر نے مشترکہ پریس کانفرنس کی۔ اس موقع پر جی ڈی اے نے پی ٹی آئی امیدوار لال چند مالھی کی حمایت کا اعلان کر دیا۔
سید صدرالدین شاہ راشدی نےعمر کوٹ کے ضمنی الیکشن میں مشترکہ امیدوار کا اعلان کرتے ہوئے کہا کہ لال مالہی ہمارے مشترکہ امیدوار ہونگے، وہ سندھ کی وکالت کرینگے، لال مالہی صوبے میں امن وامان، بے روزگاری، کرپشن اور ناانصافی کے خلاف آواز بلند کریں گے۔
انہوں نے کہا کہ ماحول اتنا سنگین ہے کہ سندھ ایک طرف اور کھوٹے سکے ایک طرف ہیں، سندھ کے عوام اب مزید کھوٹے سکوں کو قبول نہیں کرینگے، کھوٹے سکوں کو ان کی اصل جگہ بھیجا جائے گا۔
ان کا کہنا تھا کہ مرتضی جتوئی رہا ہوکر آگئے ہیں، اور باعزت رہا ہوئے ہیں، عوام میں ان کی مقبولیت بڑھی ہے، ہم سندھ کےعوام کے ساتھ کھڑے ہیں، لال مالہی دریائے سندھ بچاؤ تحریک اور تحریک انصاف کے مشترکہ امیدوار ہونگے۔
صدر الدین شاہ راشدی اور سردار عبدالرحیم نے مزید کہا کہ لال مالہی کامیاب ہوکر پہلی قرارداد چھ نئی کینالز کے خلاف لائیں گے، کالا باغ ڈیم سے متعلق بڑے پیر صاحب کا موقف واضح تھا۔ انہوں نے ایک سوال کے جواب میں کہا تھا کالا باغ ڈیم اگر کوئی کوئی بنائے گا تو کیسے اور کہاں سے واپس جائیگا۔
جی ڈی اے رہنما نے کہا کہ افغانستان نے مصنوعی دریا بنا دیا ہے، چھ نئی کینالز پر تحریک انصاف کا موقف سب کو معلوم ہے، ڈاکٹر عارف علوی نے بحیثیت صدر دستخط نہیں کیے تھے، ہم سندھ اور دریائے سندھ کو بچانے نکلے ہیں۔
ان کا کہنا تھا کہ پیپلزپارٹی قابض رہی تو نہ ہمارے اسپتال نہ دریا نہ اسکول بچیں گے، ایک طرف کینالز کا سودا کرنے والے تو دوسری طرف سندھ کے حلالی بیٹے کھڑے ہیں۔
حلیم عادل شیخ نے کہا کہ سندھو بچائو تحریک کے مشترکہ امیدوار لال چند مالہی ہیں، ارسا ایکٹ ڈاکٹر عارف علوی کے پاس گیا تھا، انہوں نے سندھ کے مفادات کے خاطر ارسا ایکٹ پر دستخط نہیں کیے تھے۔
انہوں نے کہا کہ آصف علی زرداری نے سندھ کے پانی کا سودا کر دیا ہے، پیپلز پارٹی سے نجات پا کر ہی سندھ کو بچایا جاسکتا ہے، جبکہ پی ٹی آئی کے اراکین نے دریائے سندھ پر نئی نہروں کی تعمیر کے خلاف پہلے سندھ اسمبلی میں قرارداد پیش کی تھی۔
جی ڈی اے کا انتخابی دھاندلی کے خلاف احتجاج کا اعلان
جی ڈی اے رہنمائوں نے مزید کہا کہ جس نے پہلے کہا تھا پاکستان کھپے، اب وہ پاکستان کو بیچنے نکلے ہیں، ہم ملک کو بچانے کے لئے نکلے ہیں اور عوام ہمارے ساتھ ہیں۔
صدر الدین شاہ راشدی نے کہا کہ عوامی مینڈیٹ کو تسلیم کیے بغیر بلوچستان کا مسئلہ حل نہیں ہو سکتا مذاکرات کے ذریعے ہی تمام مسائل کوحل کیا جاسکتا ہے۔
ان کا کہنا تھا کہ ریاست کو چلانا ہے تو بیٹھ کر مسائل حل کریں، مذاکرات کیوں شروع نہیں کیے جارہے سمجھ نہیں آ رہا ہے، بات چیت کرکے معاملات طے کرلئے جائیں۔
انہوں نے کہا کہ کوئی سونا مانگ رہا ہے تو اس پر ڈنڈے برسائے جا رہے ہیں، ملک میں تھنک ٹینک کی جگہ ٹنکیوں نے لے لی ہے، اب ٹنکیوں کو تبدیل کرنا پڑے گا، ہمیں نئے تھنک ٹینک لانا ہونگے۔
جی ڈی اے رہنما نے کہا کہ جب ملک تاجروں کے ہاتھوں میں دو گے تو نقصان تو ہوگا، یہ ملک کو نوچ کر کھا گئے، لیکن جان لیں کفن میں جیب نہیں، ہم ہر اس جماعت کے ساتھ ہیں جو پاکستان کے ساتھ ہے۔
ان کا کہنا تھا کہ بلاول بھٹو پانی کے متاثرین سے بات کریں، ہم بلاول بھٹو کو اپنے ساتھ آنے کی دعوت دیتے ہیں، بلاول کو اپنے والد سے کچھ نہیں ملے گا، جو ملنا ہے ہو ہمارے پاس آکر ملے گا۔
اس موقع پر غلام مرتضی جتوئی نے کہا کہ مجھ پر بکری چوری، پولیس مقابلہ کروانے کے الزامات لگا کر جھوٹے مقدمات بنائے گئے، الزام لگایا گیا کہ 12 جتوئی خاندان کے لوگ اور ڈھائی سو پولیس والے تھے جن کے درمیان مقابلہ کروایا، حیرت انگیز طور پر اس مقابلے میں ہوا کچھ نہیں۔
انہوں نے کہا کہ میں جب وفاقی وزیر تھا، اس وقت زمینوں پر قبضے کے لیے حملہ کروایا گیا، ہم نے اپنی زمینیں واگزار کروائیں، زمینوں کا معاملہ تو پرانا چل رہا ہے۔
پی ٹی آئی رہنما لال چند مالہی نے کہا کہ میں دریائے سندھ بچاؤ تحریک کا شکر گزار ہوں کہ مجھے مشترکہ امیدوار نامزد کیا ہے، اس حلقے سے مخدوم شاہ محمود قریشی فنکشنل لیگ کی حمایت سے الیکشن میں حصہ لیتے تھے، مگر وہ اس وقت جیل میں ہیں۔
انہوں نے کہا کہ اس حکومت کا نظریہ میڈیا، عدلیہ پر قدغن لگانا ہے، ملک میں صرف ایک نظریہ چل رہا ہے اور وہ صرف عمران خان کا نظریہ ہے، ہم اپنے حقوق کے لیے لڑیں گے، جس طرح عوام دریا کی حفاظت کر رہے ہیں، اسی طرح الیکشن میں عوام اپنے ووٹ کا بھی تحفظ کریں گے۔
اس موقع پر سردارعبدالرحیم نے بتایا کہ این اے 213 پر فنکشنل لیگ سے غلام نبی منگریو نے فارم جمع کروائے تھے، ان کے حوالے سے جو فیصلہ ہوا اس سے آگاہ کریں گے۔
تازہ ترین خبروں کے لیے پی این آئی کا فیس بک پیج فالو کریں
