سابق وفاقی وزیر فواد چوہدری کو لاہور پولیس نے 9 مئی کے 5 جلاؤ گھیراؤ کے مقدمات میں گناہ گار قرار دے دیا جبکہ انسداد دہشت گردی عدالت نے وکلا کو دلائل کے لیے طلب کرتے ہوئے فواد چوہدری کی عبوری ضمانتوں میں 19 مارچ تک توسیع کردی۔
تفصیلات کے مطابق لاہور کی انسداد دہشت گردی عدالت کے جج منظر علی گل نے سابق وفاقی فواد چوہدری کی عبوری ضمانتوں پر سماعت کی۔دوران سماعت فواد چودری عدالت کے روبرو پیش ہوئے جبکہ لاہور پولیس کی جانب سے تفتیشی رپورٹ عدالت میں جمع کرائی گئی۔پولیس نے اپنی رپورٹ میں فواد چوہدری کو گناہ گار قرار دے دیا، جس میں کہا گیا کہ فواد چوہدری 9 مئی کے جلاؤ گھیراؤ کے 5 مقدمات میں قصوروار ہیں، جس پر عدالت نے وکلا کو دلائل کے لیے طلب کیا ہے۔
فواد چوہدری نے عدالت کو بتایا کہ اس کے سینئر وکیل غیر حاضر ہیں اس لیے عدالت سماعت ملتوی کرنے کے احکامات جاری کرے۔عدالت نے فواد چوہدری کی استدعا کو منظور کرتے ہوئے وکلا کو 19 مارچ کو حتمی دلائل کے لیے طلب کرتے ہوئے سماعت ملتوی کردی۔فواد چوہدری کے خلاف راحت بیکری کے باہر، شیر پلاؤ پل سمیت دیگر جلاؤ گھیراؤ واقعات پر تھانہ گلبرگ، ماڈل ٹاؤن اور سرور روڑ پولیس نے 5 مقدمات درج کر رکھے ہیں۔
واضح رہے کہ راحت بیکری کے باہر، شیرپاؤ پل سمیت دیگر جلاؤ گھیراؤ کے مقدمات میں فواد چوہدری نے عبوری ضمانت کی درخواستیں دائر کر رکھی ہیں۔بعدازاں انسداد دہشت گری عدالت لاہور کے باہر میڈیا سے گفتگو کرتے ہوئے سابق وفاقی وزیر اطلاعات فواد چوہدری نے ایک بار پھر پی ٹی آئی قیادت کے خلاف لب کشائی کردی۔
فواد چوہدری نے حکومت پر تنقید کرتے ہوئے کہا کہ رمضان المبارک میں شہریوں کو آسانیاں اور سہولیات دینے کے بجائے انہوں نے 50 وزیر بنا دیے ہیں، امریکا گورنمنٹ چھوٹی کررہا ہے اور ہم بڑی کررہے ہیں۔فواد چوہدری نے کہا کہ حکومت چل نہیں رہی بلکہ گھسٹی جا رہی ہے، حکومت الیکشن ہار گئی، دھاندلی ان کے پاؤں کی بیڑیاں ہیں، ہر طبقے سے یہ حکومت بلیک میل ہو رہی ہے۔
سابق وفاقی وزیر نے پاکستان تحریک انصاف کی قیادت پر ایک بار پھر تنقید کرتے ہوئے کہا کہ پی ٹی آئی قیادت حالات سے فائدہ نہیں اٹھا رہی، پی ٹی آئی گرینڈ الائنس بنانے میں ابھی تک ناکام ہے، اسٹریٹ پاور مولانا فضل الرحمان اور پی ٹی آئی کے پاس ہے، نااہل اپوزیشن اور حکومت کے درمیان عوام پھنسی ہوئی ہے، موجودہ پی ٹی آئی عہدیداروں کا کوئی سیاسی بیک راؤنڈ نہیں ہے۔
ان کا مزید کہنا تھا کہ ریلیز عمران خان موومنٹ شروع کرنے جا رہے ہیں، 48 مقدمات کا سامنا کر رہا ہوں، حالات پہلے اور اب بھی ہمارے لیے خراب ہیں، بانی پی ٹی آئی سے مل کر موومنٹ چلانے کی اجازت لیں گے اور اگر ملاقات نہ ہو سکی تو خود ایکشن لیں گے۔
فواد چوہدری نے مزید کہا کہ انتقام کے کلچر کو ختم کریں، بانی پی ٹی آئی کا باہر آنا تحریک کے ذریعے ممکن ہے، مسلم لیگ اور پیپلز پارٹی کو کہتا ہوں انتقام کا کلچر ختم کریں، اسی طرح سیاسی ٹمپریچر نیچے آ سکتا ہے۔
تازہ ترین خبروں کے لیے پی این آئی کا فیس بک پیج فالو کریں
