مستحق خاندانوں کیلئے رمضان اور عید پیکیج منظور

خیبرپختونخوا کابینہ نے صوبے کے مستحق خاندانوں کے لیے رمضان اور عید پیکیج کی منظوری دی ہے۔

وزیراعلیٰ خیبرپختونخوا علی امین خان گنڈا پور کی زیر صدارت صوبائی کابینہ کا 25 واں اجلاس منعقد ہوا، جس میں کابینہ نے صوبے کے 10 لاکھ غریب خاندانوں کے لیے رمضان اورعید پیکیج کے لیے فنڈ کی منظوری دے دی۔

اجلاس میں گفتگو کرتے ہوئے وزیراعلیٰ علی امین گنڈاپور کا کہنا تھا کہ غربا، یتیموں اور ٹرانسجنڈر افراد کو شفاف طریقے سے پیکیج فراہم کیا جائے، دہشت گردی سے متاثرہ غریب خاندانوں کو پیکیج میں شامل رکھا جائے۔علی امین گنڈاپور نے متعلقہ حکام کو ہدایت کی کہ غریب معزور افراد کا خصوصی خیال رکھا جائے اور صوبے کے تمام ٹرانسجنڈر افراد کو پیکیج دیا جائے، پیکج کی تقسیم 15 رمضان سے پہلے مکمل کی جائے۔

انہوں نے مزید کہا کہ تنخواہیں اور پنشن رمضان المبارک شروع ہونے سے قبل 25 فروری کو ادا کی جائیں۔اجلاس میں ایبٹ آباد پبلک اسکول میں زیرِ تعلیم 15 یتیم طلبا کے لیے 4.920 ملین روپے کی سالانہ گرانٹ کی منظوری بھی دی گئی۔صوبائی کابینہ نے سپریم کورٹ کے فیصلے کی رو سے کیڈٹ کالج سوات فیز-III پروجیکٹ کے لیے زمین کی لاگت میں اضافے کے تحت فنڈز کی منظوری بھی دے دی۔

ایلیمنٹری اینڈ سیکنڈری ایجوکیشن فاؤنڈیشن کے 3 ہزار 687 اساتذہ کی تنخواہوں کے لیے 1028.673 ملین روپے جاری کرنے کی منظوری اور بس اڈوں کی بہتر انسپکشن کے لیے موٹر وہیکل رولز 1969 میں ترامیم کرنے کی منظوری بھی صوبائی کابینہ نے دی ہے۔

بی ایس نرسنگ گریجویٹس کے لیے ماہانہ 31 ہزار روپے انٹرنشپ اور سائنس، ٹیکنالوجی و آئی ٹی کے لیے خیبرپختونخوا گورنمنٹ رولز آف بزنس 1985 میں ترامیم بھی منظور کی گئی ہیں جبکہ محکمہ اوقاف کے لیے بھی صوبائی کابینہ نے گرانٹ کی منظوری دی ہے۔

تازہ ترین خبروں کے لیے پی این آئی کا فیس بک پیج فالو کریں

close