علی امین کی بانی پی ٹی آئی سے ملاقات،شیرافضل کی واپسی ہوگی یانہیں؟اہم فیصلہ

اسلام آباد(پی این آئی)عمران خان سے علی امین گنڈاپور نے ملاقات کی ہے، جس میں شیر افضل مروت سے متعلق اہم بات چیت ہوئی۔

علی امین گنڈاپور نے بانی چیئرمین عمران خان سے پارٹی رہنما شیر افضل مروت کو پارٹی سے نکالنے کا فیصلہ واپس لینے کی بھی درخواست کردی۔تفصیلات کے مطابق ذرائع کا کہناہے کہ آج جمعرات کے دن چیئرمین پی ٹی آئی عمران خان سے ملاقات کا روز ہے۔ اس سلسلے میں وزیراعلیٰ خیبر پختونخوا علی امین نڈاپور کے علاوہ پارٹی سے وابستہ دیگر افراد بھی ملاقات کے لیے اڈیالہ جیل پہنچے۔عمران خان سے ملاقات کے لیے اڈیالہ جیل آنے والوں میں علی امین گنڈاپور کے علاوہ صوبائی وزیر خیبر پختونخوا سہیل آفریدی، حلیم عادل شیخ، بریگیڈیئر ریٹائرڈ مصدق عباسی، سیمابیہ طاہر، سابق ڈپٹی اسپیکر کے پی اسمبلی مشتاق غنی اور صوبائی وزیر تیمور جھگڑا شامل تھے۔

وزیراعلیٰ خیبر پخونخوا علی امین گنڈاپور عمران خان سے 2 گھنٹے طویل ملاقات کے بعد اڈیالہ جیل سے واپس روانہ ہوئے۔ذرائع کے مطابق انہوں نے بانی پی ٹی آئی سے صوابی جلسے، پارٹی اور دیگر سیاسی امور پر تفصیلی بات چیت کی۔ علاوہ ازیں علی امین گنڈاپور نے بانی چیئرمین عمران خان سے پارٹی رہنما شیر افضل مروت کو پارٹی سے نکالنے کا فیصلہ واپس لینے کی بھی درخواست کی۔

ذرائع کا کہناہے کہ ملاقات میں سیاسی امور کے علاوہ صوبے میں گورننس کے معاملات پر بھی گفتگو ہوئی،بانی پی ٹی آئی نے علی امین گنڈا پور کو گورننس ٹھیک کرنے کیلئے دو ماہ کا پہلے بھی وقت دیا ہوا تھا،بانی پی ٹی آئی اور علی امین گنڈا پور کے درمیان تحریک انصاف کے اندرونی اختلافات پر بھی بات چیت ہوئی۔ملاقات میں تمام تر سیاسی صورتحال اور جاری کیسز کے حوالے سے تفصیلی تبادلہ خیال بھی ہوا۔