رانا ثنااللہ نے بالآخر اعتراف کر لیا

اسلام آباد (پی این آئی)مسلم لیگ (ن) کے رہنما اور وزیراعظم کے مشیر برائے سیاسی امور رانا ثنااللہ نے اعتراف کیا ہے کہ شاہد خاقان عباسی اور مفتاح اسماعیل کے پارٹی سے جانے کا ہمیں نقصان ہوا۔

نجی ٹی وی “جیونیوز “کے پروگرام” جیو پاکستان “میں گفتگو کرتے ہوئے رانا ثنااللہ نے کہا کہ ہم مولانا فضل الرحمان کے بغیر آئینی ترمیم کےلیے آگے نہیں بڑھے اور انہیں 26 ویں آئینی ترمیم میں ساتھ لے کر چلے، ابتدا ءمیں ہم سے تھوڑی سی کوتاہی ہوئی اس کا ہم نے ازالہ کیا۔ مولانا فضل الرحمان اور دیگر سیاستدانوں سے بھی بات ہوگی اور جو بھی مطالبات ہیں ان پر سیاستدانوں کو بیٹھنا چاہیے۔

رانا ثنا اللہ کا کہنا تھا کہ شاہد خاقان عباسی اور مفتاح اسماعیل کے پارٹی سے جانے کا ہمیں نقصان ہے، ہم نہیں چاہتے تھے کہ مفتاح اور شاہد خاقان عباسی پارٹی سے جائیں، جب بھی ضرورت پڑی مفتاح اسماعیل اور شاہد خاقان ہمارے پاس آسکتے ہیں اور ہم ان کے پاس جاسکتے ہیں۔ انہوں نے مزید کہا کہ سیاست دان اگر آپس میں بیٹھیں گے تو معاملات الجھنے کے بجائے سلجھیں گے۔