بانی پی ٹی آئی عمران خان نے نئی کمیٹی تشکیل دے دی

اسلام آباد(پی این آئی) پاکستان تحریک انصاف (پی ٹی آئی) کے بانی چیئرمین عمران خان نے بین الاقوامی رابطہ کاری سے متعلق بنائی گئی کمیٹی تحلیل کرتے ہوئے نئی کمیٹی تشکیل دے دی۔

ذرائع کے مطابق سابق وزیراعظم عمران خان نے بین الاقوامی رابطہ کاری سے متعلق بنائی گئی کمیٹی تحلیل کر دی۔ذرائع کے مطابق عمران خان نے بین الاقوامی سطح پر تعلقات اور رابطہ کاری سے متعلق نئی کمیٹی تشکیل بنادی، نئی کمیٹی کی سربراہی بطور کنونیئر ذلفی بخاری کریں گے جبکہ ڈاکٹر شہباز گل، عاطف خان اور سجاد برکی بھی نئی کمیٹی میں شامل ہوں گے۔ذرائع نے بتایا کہ کمیٹی بین الاقوامی سطح پر مختلف امور پر پی ٹی آئی کے لیے روابط کاری کرے گی جبکہ بانی چئیرمین پی ٹی آئی کی ہدایت کے بعد نئی کمیٹی کا نوٹیفکیشن جلد جاری کیا جائے گا۔

واضح رہے کہ بین الاقوامی روابط سے متعلق ایک کمیٹی گزشتہ روز تشکیل دی گئی تھی، پرانی کمیٹی میں سلمان اکرم راجہ، علی اصغر، خدیجہ شاہ، ولید اقبال اور سجاد برکی شامل تھے۔دوسری جاب پاکستان تحریک انصاف جیلیں اور مقدمات کے باوجود ہر فیصلے میں کنفیوژن کا شکار ہے، کل بانی چئیرمین پی ٹی آئی عمران خان کی ہدایت پرتشکیل دی گئی 6 رکنی بین الاقوامی رابطہ کاری کمیٹی آج تحلیل ہوگئی۔پی ٹی آئی نے سابق وزیراعظم عمران خان کی ہدایت پر کل 6 رکنی بین الاقوامی رابطہ کاری کمیٹی تشکیل دی تھی، جس کی سربراہی سابق سیکٹری اطلاعات پی ٹی آئی رؤف حسن کر رہے تھے وہ آج تحلیل کردی گئی، جس کے بعد اب زلفی بخاری کی سربراہی میں نئی کمیٹی آج تشکیل دی گئی۔