افسوسناک خبر ، مسافر بس الٹ گئی ،مسافر جانبحق و زخمی

خیبر پختونخوا کے ضلع مانسہرہ میں ہزارہ ایکسپریس وے پر مسافر بس الٹنے سے کم از کم چار مسافر جاں بحق اور 3 زخمی ہو گئے۔

ریسکیو 1122 کے ترجمان نے بتایا کہ حادثہ منگل کی صبح پیش آیا، حادثے کا شکار مسافر بس راولپنڈی سے گلگت بلتستان جا رہی تھی۔انہوں نے بتایا کہ لاشوں اور زخمیوں کو مانسہرہ کے کنگ عبداللہ ہسپتال منتقل کر دیا گیا ہے، انہوں نے کہا کہ حادثہ شدید بارش کی وجہ سے پیش آیا اور کوسٹر پھسل کر ڈرائیور سے بے قابو ہوگئی۔

انہوں نے بتایا کہ جاں بحق اور زخمیوں کا تعلق گلگت بلتستان اور کوہستان کے علاقوں سے ہے۔دوسری جانب مانسہرہ کی ضلعی انتظامیہ نے پیر کی رات شدید برف باری کے بعد ناران بابوسر روڈ کو بھی ٹریفک کے لیے بند کردیا تھا۔

ڈپٹی ڈائریکٹر نیشنل ہائی وے اتھارٹی غلام عباس نے بتایا کہ قراقرم ہائی وے کوہستان کو 2 مقامات پر بند کر دیا گیا، پھر بعد میں اسے ہر قسم کی ٹریفک کے لیے دوبارہ کھول دیا گیا۔خیبر پختونخوا اور گلگت بلتستان کے شمالی علاقہ جات میں تیز ہواؤں کے ساتھ موسلا دھار بارش اور پہاڑوں پر برفباری ہونے کے بعد خطے میں موسم سرد ہوگیا۔