مولانا فضل الرحمٰن کا پی ٹی آئی سےبڑا مطالبہ

سربراہ سربراہ جمعیت علمائے اسلام (جے یو آئی) مولانا فضل الرحمٰن نے پاکستان تحریک انصاف سے شنگھائی تعاون تنظیم (ایس سی او) کانفرنس کے تناظر میں 15 اکتوبر کو ہونے والے احتجاج کو مؤخر کرنے کی اپیل کردی۔ پاکستان تحریک انصاف (پی ٹی آئی) کے رہنما اسد قیصر نے سماجی رابطے کے پلیٹ فارم ’ایکس‘ پر پیغام میں لکھا کہ ان کا مولانا فضل الرحمٰن سے ٹیلیفونک رابطہ ہوا جس میں سربراہ جے یو آئی نے بانی پی ٹی آئی عمران خان کو جیل میں طبی سہولتوں کی فراہمی اور ذاتی معالج تک رسائی دینے کا مطالبہ کیا ہے۔

انہوں نے مزید کہا کہ مولانا فضل الرحمٰن نے پی ٹی آئی سے ایس سی او کانفرنس کے تناظر میں 15 اکتوبر کو ہونے والے احتجاج کو مؤخر کرنے کی اپیل کی ہے۔اسد قیصر نے بتایا جے یو آئی (ف) کے آئینی ترمیم کے مسودے کے اکثر نکات پر دونوں جماعتوں میں ہم آہنگی ہے، مسودے پر مزید غور کیلئے 17 اکتوبر کو دونوں جماعتوں کا اجلاس ہوگا۔رہنما پی ٹی آئی نے بتایا کہ انہوں نے مولانا فضل الرحمٰن کو یقین دلایا ہے کہ ان کی تجاویز پارٹی کے سامنے پیش کی جائیں گی اور مشاورت کے بعد انہیں پارٹی فیصلے سے آگاہ کیا جائے گا۔