اسلام آباد ( پی این آئی) ترجمان پاکستان تحریک انصاف نے ہارس ٹریڈنگ اور فلورکراسنگ پر قائم ریاستی حکومت سے فوری مستعفیٰ ہونےکا مطالبہ کیا ہے، انہوں نے کہا کہ کشمیر میں تشدد کی بجائے پرامن احتجاج کو اپنی جمہوری طاقت بنائیں، ریاست کو ہارس ٹریڈنگ یا فارم 47 زدہ حکمرانوں کی بجائے قانون و عوامی مینڈیٹ کو ملکی نظام کی بنیاد بنایا جائے۔
ایکس پر جاری بیان میں ترجمان پی ٹی آئی نے کہا کہ پاکستان تحریک انصاف کی جانب سے آزادجموں و کشمیر میں شہریوں کی ہلاکتوں کی شدید مذمت کی گئی، ہارس ٹریڈنگ اور فلور کراسنگ کی بنیاد پر قائم ریاستی حکومت سے فوری طور پر مستعفیٰ ہونے کا مطالبہ کیا گیا۔ شہریوں کے قتل کی تحقیقات اور ذمہ داروں کے تعیّن کا بھی مطالبہ کیا گیا۔پاکستان تحریک انصاف کو آزاد جموں و کشمیر میں تیزی سے بگڑتی صورتحال پر گہری تشویش ہے، ساکھ، صلاحیت اور مینڈیٹ سے محروم حکومتیں آزاد جموں و کشمیر میں مقبوضہ جموں و کشمیر کی سی صورتحال پیدا کررہی ہیں۔
ترجمان تحریک انصاف نے کہا کہ پرامن احتجاج اور بنیادی حقوق کے معاملے میں کشمیر اور وفاقی حکومت کی جانب سے مودی کی پیروی شرمناک اور قابلِ مذمت ہے، ساکھ، صلاحیت اور عوامی تائید سے محروم حکومتیں ملک و قوم کیلئے ایک وبال کی صورت اختیار کر چکی ہیں، ماورائے آئین طاقت کے استعمال اور آمرانہ طرزِ حکمرانی پورے سماج میں کشیدگی اور انتشار کا پیش خیمہ بن رہے ہیں، مہذب جمہوری معاشروں میں عوام کی رائے کو طاقت سے کچلنے کی کوششوں کی بجائے حکومتیں ان کی روشنی میں مسائل کے حل کی تدبیر کرتی ہیں۔