نواز شریف کی ڈاکٹر یاسمین راشد کے مقابلے میں جیت متنازعہ ہوگئی

لاہور(پی این آئی) پاکستان تحریک انصاف کے رہنما لطیف کھوسہ کا کہنا ہے کہ نوازشریف کی ڈاکٹر یاسمین کے مقابلے میں جیت متنازعہ ہے۔

انہوں نے دعویٰ کیا کہ ہم بغیر کسی بیساکھی کے حکومت بنانے میں کامیاب ہو جائیں گے۔ن لیگ حکومت نہیں بنا سکتی، نوازشریف واپس جائیں گے۔ن لیگ کی کوئی اکثریت نہیں۔ نوازشریف یہ کہتے ہوئے واپس جائیں گے کہ مجھے کیوں بلایا۔لطیف کھوسہ نے کہا کہ ن لیگ کی کوئی اکثریت نہیں ، نہ مرکز میں نہ پنجاب میں حکومت بنا سکتے ہیں۔خیال رہے کہ ملک کے سب سے بڑے ٹاکرے میں قائد مسلم لیگ (ن) نواز شریف نے حلقہ این اے 130سے تحریک انصاف کی حمایت یافتہ آزاد امیدوار ڈاکٹر یاسمین راشد کو شکست دیدی جبکہ مسلم لیگ (ن) کے صدر شہباز شریف ،سینئر نائب صدر مریم نواز اور نائب صدر حمزہ شہباز نے بھی قومی و صوبائی حلقوں میں کامیابی حاصل کر لی۔ غیر حتمی و غیر سرکاری نتائج کے مطابق قائد مسلم لیگ (ن) نواز شریف لاہور کے حلقہ این اے 130سے ایک لاکھ 71ہزار 24ووٹ لیکر کامیاب ہوئے جبکہ پی ٹی آئی کی حمایت یافتہ امیدوار ڈاکٹر یاسمین راشد کو ایک لاکھ 15ہزار 43ووٹ ملے۔

دوسری جانب مسلم لیگ (ن) کے صدر شہباز شریف اور سینئر نائب صدر مریم نواز نے بھی قومی و صوبائی حلقوں میں کامیابی حاصل کر لی۔ غیر حتمی و غیر سرکاری نتیجے کے مطابق سابق وزیراعظم شہباز شریف لاہور سے صوبائی اور قومی اسمبلی کی سیٹیں بچانے میں کامیاب ہو گئے، انہوں نے حلقہ این اے 123سے 63ہزار 953ووٹ لیے، شہباز شریف کے مد مقابل آزاد امیدوار افضال عظیم پاہٹ 48ہزار 486ووٹ ہی لے سکے۔مسلم لیگ (ن) کے صدر شہباز شریف نے پنجاب اسمبلی کے حلقہ پی پی 158سے 38ہزار 642ووٹ لے کر کامیابی حاصل کی جبکہ آزاد امیدوار چودھری یوسف علی 23ہزار 874ووٹ لے کر دوسرے نمبر پر رہے۔

علاوہ ازیں غیر سرکاری اور غیر حتمی نتیجے کے مطابق مسلم لیگ (ن) کی چیف آرگنائزر مریم نواز بھی پنجاب اسمبلی کے حلقہ 159لاہور سے کامیاب ہو گئی ہیں، لاہور کے پی پی 159میں مریم نواز نے 23ہزار 598ووٹ لیے، آزاد امیدوار مہر شرافت 21ہزار 491ووٹ لیکر دوسرے نمبر پر رہے۔مسلم لیگ (ن) کے نائب صدر حمزہ شہباز نے بھی لاہور کے حلقہ این اے 118میں میدان مار لیا۔ غیر حتمی غیر سرکاری نتیجے کے مطا بق حمزہ شہباز نے ایک لاکھ 5ہزار 960ووٹ حاصل کئے جبکہ آزاد امیدوار عالیہ حمزہ نے ایک لاکھ 8سو 03ووٹ لے کر دوسرے نمبر پر رہیں۔