لاہور (آئی این پی) سابق وزیراعظم و پاکستان مسلم لیگ (ن) کے صدر شہباز شریف نے کہا ہے کہ عوام دو تہائی اکثریت دے دہشت گردی کی طرح مہنگائی کی بھی کمر توڑ دیں گے، الیکشن میں بھرپور تیاری کے ساتھ اتریں گے، (ن) لیگ کی کامیابی پاکستان کومسائل سے نجات دلائے گی۔صدر (ن) لیگ سے پارٹی رہنمائوں اور سابق ارکان قومی اسمبلی نے ملاقات کی، علی پرویز ملک، رانا قاسم نون، ڈاکٹر مظہر اقبال چودھری اور سلمان خان ملاقات کرنے والوں میں شامل تھے۔
ملاقات میں تنظیمی اور انتخابات کی تیاریوں کے حوالے سے امور پر گفتگو ہوئی، شہباز شریف نے انتخابی تیاریوں کے لئے پارٹی رہنماں اور کارکنوں کے جذبے کو سراہا۔اس موقع پر گفتگو کرتے ہوئے صدر مسلم لیگ (ن) شہباز شریف کا کہنا تھا کہ الیکشن میں بھرپور تیاری کے ساتھ اتریں گے، اللہ تعالی کے فضل اور عوام کے اعتماد سے الیکشن میں بھرپور کامیابی حاصل کریں گے۔سابق وزیراعظم نے مزید کہا کہ مسلم لیگ (ن) کی کامیابی پاکستان کو مسائل سے نجات دلانے کے لئے اہم ہے، عوام ہمیں دوتہائی اکثریت دے دہشت گردی کی طرح مہنگائی کی کمر بھی توڑ دیں گے۔
