اسلام آباد (پی این آئی)شہر قائد کے علاقے گلستان جوہر میں ایک گھر میں 40 منٹ تک ڈکیتی کی واردات کرنے والے ڈکیتوں کی دیدہ دلیری اور سفاکی نے محکمہ پولیس کی کارکردگی پر سوال کھڑا کر دیا ہے، مسلح ڈکیتوں نے واردات کے بعد گلی میں چوکیدار کو گولی بھی ماری۔تفصیلات کے مطابق کراچی کے علاقے گلستان جوہر بلاک 7 میں تین روز قبل دن دہاڑے 5 ڈاکوئوں نے ایک گھر میں ڈکیتی کی واردات کی تھی، جس کی سی سی ٹی وی فوٹیجز بھی منظرعام پر آگئی ہے ۔
واردات کے بعد ڈاکوئوں نے گلی میں شہریوں کی موٹر سائیکلیں بھی چھینیں اور فرار ہونے سے قبل گلی میں موجود چوکیدار کو بھی گولی مار دی، جس سے وہ شدید زخمی ہو گئے۔مسلح ڈاکو ایک کے بعد ایک واردات کرتے رہے لیکن پولیس نہ پہنچی، فوٹیج میں دیکھا جا سکتا ہے کہ 5 ڈاکو گھر میں داخل ہوئے اور اہل خانہ کو یرغمال بنا لیا، اہل خانہ نے ایف آئی آر میں لکھوایا کہ 2 ڈاکو پینٹ شرٹ اور 3 شلوار قمیض میں ملبوس تھے، اور انھوں نے گھر والوں کو ایک کمرے میں بند کیا۔
مدعی سید احمد حنین کے مطابق ڈاکوئوں نے الماریوں سے 2 لاکھ 5 ہزار نقدی، اور 4 لاکٹ چین سیٹ لوٹے، 3 چین، 16 انگوٹھیاں، 1 قیمتی گھڑی، 1 موبائل فون، مرحوم بھائی کا لائسنس یافتہ پستول بھی لوٹ لیا، مدعی نے بتایا کہ ڈاکو اطمینان سے 40 منٹ تک گھر میں واردات کرتے رہے، اور ڈکیتی کے بعد شور سن کر پیچھے آنے والے چوکیدار کو بھی ٹانگ میں گولی مار دی۔فوٹیج میں ڈاکوئوں نے گلی میں موجود شہری سرفراز اور شہزاد سے موٹر سائیکلیں چھینیں، اور اپنی دونوں موٹر سائیکلیں گلی میں پھینک کر فرار ہوتے دیکھا جا سکتا ہے۔ پولیس نے تھانہ گلستان جوہر میں مقدمہ درج کرنے کے بعد کیس تفتیشی پولیس کے حوالے کر دیا ہے۔
تازہ ترین خبروں کے لیے پی این آئی کا فیس بک پیج فالو کریں
