وزیراعظم شہباز شریف بھی سابق چیف جسٹس ثاقب نثار پر برس پڑے، سنگین الزامات کی بوچھاڑ کر دی

فیصل آباد (پی این آئی)وزیراعظم شہباز شریف نے کہا ہے کہ نواز شریف کے خلاف سازشی ٹولے کا سربراہ ثاقب نثار تھا، نواز شریف کا تو پاناما اسکینڈل میں نام ہی نہیں تھا پھر بھی انہیں سزا دی گئی۔

فیصل آباد میں ستیانہ بائی پاس کا سنگ بنیاد رکھنے کے بعد تقریب سے خطاب کرتے ہوئے ان کا کہناتھا کہ بجلی مہنگی کرنے کے معاملے میں مجبوراً آئی ایم کی شرط پوری کرنی پڑی، ایک شخص کہتا تھا مرجاؤں گا مگر آئی ایم ایف کے پاس نہیں جاؤں گا لیکن اس نے آئی ایم ایف سے معاہدہ کیا اور اپنا ہی کیا گیا معاہدہ توڑ کر سارا بوجھ اگلی حکومت پر منتقل کردیا۔وزیراعظم نے عوام کو مخاطب کرتے ہوئے کہا کہ 2018 کے انتخابات میں ن لیگ کا مینڈیٹ چرا کر بہروپیے حکومت میں لائے گئے، آپ لوگوں کو اس بار ن لیگ کو ووٹ دے کر بدلہ لینا ہے، اگلے وزیراعظم نواز شریف ہوں گے، ن لیگ کو اگلے پانچ سال کا مینڈیٹ ملا تو ملک کی قسمت بدل دیں گے۔انہوں نے کہا کہ مولانا فضل الرحمان ہمارے اتحادی ہیں بلکہ ن لیگ کا جے یو آئی کے ساتھ قدرتی رشتہ ہے۔