فری بجلی، پیٹرول اور دیگر الاؤنسز ختم کرنے کا اعلان، سرکاری ملازمین کی موجیں ختم ہوگئیں

مظفر آباد (پی این آئی) آزاد کشمیر حکومت نے اسرکاری ملازمین کیلیے فری بجلی، پیٹرول اور دیگر الاؤنسز ختم کرنے کا اعلان کر دیا۔ سرکاری ملازمین کی چھٹی کے ایام کی تنخواہوں کی ادائیگی پر بھی پابندی لگا دی گئی۔

تفصیلات کے مطابق محکمہ مالیات آزادکشمیر کی طرف سے نئی مالیاتی پالیسی کا نوٹیفکیشن جاری کر دیا گیا ہے۔فیصلے سے متعلقہ اداروں اور سرکاری دفاتر کو آگاہ کیا گیا ہے۔ آفیسرز کیلئے نئی سرکاری گاڑیاں خریدنے اور بیرون ملک دوروں پر پابندی عائد کر دی گئی ہے۔ واضح رہے کہ آزاد جموں و کشمیر قانون ساز اسمبلی کے اجلاس میں اراکین اسمبلی کی طرف سے پیش کردہ مختلف قراردادیں منظور کر لی گئیں۔ اجلاس کے دوران مقبوضہ جموں کشمیر میں بھارتی ریاستی دہشتگردی کی شدید الفاظ میں مذمت کی گئی، حریت رہنما یاسین ملک، میر واعظ عمر فاروق ، مسرت عالم بٹ و دیگر کو بے بنیاد مقدمات میں پابند سلاسل رکھنے کی بھی مذمت کی گئی۔اراکین اسمبلی کی جانب سے ان کشمیری رہنماؤں کی زندگیوں کو لاحق خطرات پر بھی تشویش کا اظہار کیا گیا، اجلاس میں پاکستان کے دفاع، سلامتی اور استحکام کیلئے افواج پاکستان کے شہدا کو خراج عقیدت پیش کیا گیا۔

اجلاس میں 09 مئی حملوں کے منصوبہ ساز، سہولت کار اور عملدرآمد کرنے والے ہر فرد کو قانون کے کٹہرے میں لانے کا مطالبہ کیا گیا اور افواج پاکستان اور پاکستان کے سکیورٹی اداروں اور ان کے اہل خانہ کیساتھ مکمل یکجہتی کا اظہار کیا گیا۔ قانون ساز اسمبلی اجلاس کے دوران اراکین نے کہا کہ ملک کے دفاع اور سلامتی کیلئے آزاد کشمیر کے عوام افواج پاکستان کے شانہ بشانہ ہیں اور رہیں گے۔