عمران خان کے سیکیورٹی انچارج کو کس نے گرفتار کیا؟ بڑی خبر آگئی

اسلام آباد(پی این آئی) ایف آئی اے نے پاکستان تحریک انصاف کے سربراہ عمران خان کے سیکیورٹی انچارج افتخار رسول گھمن کی گرفتاری ظاہر کردی۔

ایف آئی اے ہیڈکوارٹرز نے تفصیلات جاری کرتے ہوئے کہا ہے کہ افتخار رسول گھمن کو 12 اپریل 2023 کو گرفتار کیا گیا، ملزم افتخار رسول گھمن ایف آئی اے اینٹی ہیومن ٹریفیکنگ سرکل لاہور میں درج مقدمہ نمبر 291/2001 میں گزشتہ 22 سال سے مفرور تھا۔ایف آئی اے کا کہنا ہے کہ گرفتاری کے بعد ملزم افتخار رسول گھمن عدالتی احکامات پر کیمپ جیل لاہور میں ہے ایف آئی اے کے پاس نہیں، اسکے علاوہ ملزم افتخار گھمن ایف آئی اے اینٹی منی لانڈرنگ سرکل لاہور میں درج مقدمہ نمبر 06/2023 میں بھی نامزد ہے۔دوسری جانب عمران خان نے اپنے سیکیورٹی انچارج افتخار رسول گھمن کی ایف آئی اے کی تحویل میں ہونے پر تحفظات کا اظہار کرتے ہوئے کہا ہے کہ میری سیکیورٹی کمزور کرنے کیلئے افتخار گھمن کو جان بوجھ کر ہدف بنایا جارہا ہے۔

سابق وزیراعظم عمران خان نے اپنے ٹویٹ میں گہری تشویش کا اظہار کرتے ہوئے تحریر کیا کہ میرے سیکیورٹی انچارج افتخار گھمن تاحال ایف آئی اے کی تحویل میں ہیں، وہ سمندر پار مقیم پاکستانی ہیں جنہوں نے اپنا سب کچھ چھوڑا اور حقیقی آزادی کے حصول کے لیے ہمارا ہاتھ بٹانے پاکستان آئے میری سیکیورٹی کمزور کرنے اور تحریک انصاف کی صفوں میں خوف و ہراس پھیلانے کے لیے انھیں جان بوجھ کر ہدف بنایا جارہا ہے ہم بخوبی واقف ہیں کہ اس سب کے پیچھے کون ہے۔