ہم نے کس کے کہنے پر اسمبلیاں توڑیں؟ شاہ محمود قریشی کا اہم بیان آگیا

اسلام آباد ( پی این آئی ) پاکستان تحریک انصاف کے رہنما شاہ محمود قریشی کا کہنا ہے کہ کہ ہم نے پی ڈی ایم کے کہنے پر صوبائی اسمبلیاں تحلیل کیں۔ شاہ محمود قریشی نے ایک بیان میں کہا کہ خدشہ ہے حکومت انتخابات کو طول دینا چاہتی ہے۔

پاکستان ڈیموکریٹک موومنٹ کے کہنے پر صوبائی اسمبلیاں تحلیل کیں۔پی ڈی ایم نے کہا تھا پنجاب اسمبلی توڑیں تو قومی اسمبلی توڑ دیں گے لیکن ن لیگ اپنے موقف سے مکر گئی۔شاہ محمود قریشی نے کہا کہ مناسب تجاویز دی گئیں تو راستہ نکالیں گے۔جبکہ وزیر دفاع خواجہ آصف نے تحریک انصاف سے رابطے کا انکشاف کیا ہے۔وزیر دفاع خواجہ آصف کا کہنا ہے کہ سپریم کورٹ کے حکم پر پنجاب میں الیکشن کیلئے پیسے جاری نہیں کریں گے، توہین عدالت کا معااملہ جب آئے گا تب دیکھا جائے گا۔جیو کے پروگرام میں گفتگو کرتے ہوئے خواجہ آصف نے کہا کہ مذاکرات پر عدالتی ڈکٹیشن نہیں مانیں گے، اپنی مرضی سے مذاکرات کریں گے اور بات 2018 سے شروع کی جائے گی۔ انہوں نے کہا کہ تحریک انصاف کے ساتھ آج ایک رابطہ ہوا ہے، یہ سمجھوتہ ہوا ہے کہ عید کے بعد دوبارہ رابطہ کیا جائے گا، بطور پارلیمنٹیرین اپنے اختیارات کا تحفظ کرنا ہے، ہمیں پارلیمنٹ نے فنڈز دینے سے منع کیا ہے، ہم چار تین کے فیصلے کو فوقیت دیتے ہیں۔

تین دو کا فیصلہ نہیں مانتے، صرف عدالت کے احترام میں پیش ہو رہے ہیں۔خواجہ آصف نے مزید کہا کہ مذاکرات بھی ہوئے تو 2018 کے الیکشن سے شروع کریں گے، آئین میں صرف 90 دن کا نہیں یہ بھی لکھا ہے کہ ایک دن میں الیکشن کرائیں، سب پر واضح ہونا چاہیے کہ آئین نے پارلیمنٹ کی کوکھ سے جنم لیا ہے۔ انہوں نے کہا کہ اس سے بڑی کیا زیادتی ہوسکتی ہے جو اس وقت ہورہی ہے ، کیا مذاکرات کا ایجنڈا سپریم کورٹ دے گا۔