سپریم کورٹ کا صوبائی اسمبلیوں کے الیکشن میں تاخیر پر نوٹس، اعتزاز احسن کا ردعمل بھی آگیا

اسلام آباد (پی این آئی) اعتزاز احسن کا کہنا ہے کہ پنجاب اور خیبرپختونخواہ میں عام انتخابات کے انعقاد کے حوالے سے جلد فیصلہ آ جائے گا۔ ملک کے سینئر قانون دان اعتزاز احسن نے چیف جسٹس کے از خود نوٹس پر ردعمل دیتے ہوئے کہا کہ ایک دو آرٹیکل دیکھنے ہیں سپریم کورٹ جلد فیصلہ دے گی۔

آئین واضح ہے کہ 90 دن کے اندر انتخابات کروانا ہوں گے۔ حیلے بہانے نہیں چلیں گے، چیف جسٹس آف پاکستان نے بہانوں کا راستہ روک دیا ہے، چیف جسٹس نے نوٹس لے کر انتہائی ضروری کام کیا۔ مجھے لگتا ہے کہ ایک دو دن میں اس کیس کا فیصلہ آ جائے گا۔ واضح رہے کہ پنجاب اور خیبرپختونخواہ میں عام انتخابات کے انعقاد کے حوالے سے اہم پیش رفت ہوئی ہے۔اے آر وائی نیوز کے مطابق چیف جسٹس آف پاکستان نے پنجاب اور خیبرپختونخواہ اسمبلیوں کے انتخابات کی تاریخ کے اعلان میں ہونے والی تاخیر کے معاملے کا از خود نوٹس لے لیا ہے۔بتایا گیا ہے کہ رجسٹرار سپریم کورٹ کے نوٹ پر چیف جسٹس نے از خود نوٹس لیا۔ چیف جسٹس کی جانب سے لیے گئے از خود نوٹس کے حوالے سے کہا ہے کہ علم میں لایا گیا کہ پنجاب اور خیبرپختونخواہ اسمبلیوں کو تحلیل ہوئے ایک ماہ ہو چکا۔ چیف جسٹس نے پنجاب اور خیبرپختونخواہ میں عام انتخابات کے انعقاد کے معاملے پر لیے گئے از خود نوٹس کی سماعت کیلئے 9 رکنی بینچ تشکیل دیا ہے۔

معاملے کی سماعت کا آغاز جمعرات 23 فروری سے ہو گا۔ چیف جسٹس کی جانب سے تشکیل دیے گئے بینچ میں چیف جسٹس عمر عطا بندیال سمیت، جسٹس یحیٰ آفریدی، جسٹس محمد علی مظہر، جسٹس اطہر من اللہ، جسٹس مظاہر علی اکبر نقوی، جسٹس اعجاز الاحسن، جسٹس منصور علی خان، جسٹس منیب شامل ہیں۔