پیپلزپارٹی رہنما نے عمران خان کے راولپنڈی جلسے سے بڑا جلسہ کرنے کا اعلان کر دیا

کراچی (پی این آئی)ٹنڈو جام میں 2 دن بعد عمران خان سے بڑا جلسہ کر کے دکھاؤں گا، ’عمران نیازی کا شو ناکام رہا کیونکہ دعوے کے مطابق لوگوں نے شرکت نہیں کی، سینئر پی پی رہنما شرجین میمن کا ٹویٹ۔تفصیلات کے مطابق وزیراطلاعات سندھ شرجیل انعام میمن نے کہا ہے کہ عمران خان کے جلسے سے بڑا عوامی جلسہ اپنے حلقے میں کر کے دکھاؤں گا۔ سماجی رابطے کی سائٹ ٹویٹر پر پی ٹی آئی کے پنڈی میں ہونے والے جلسے پر ردعمل دیتے ہوئے شرجیل میمن نے کہا کہ ’عمران نیازی کا شو ناکام رہا کیونکہ دعوے کے مطابق لوگوں نے شرکت نہیں کی‘۔ انہوں نے اعلان کیا کہ میں اگلے دو روز میں اپنے حلقے ٹنڈو جام میں عوامی طاقت کا مظاہرہ کروں گا جو عمران خان کے جلسے سے بڑا جلسہ ہوگا۔

شرجیل میمن نے واضح کیا کہ ٹنڈو جام میں ہونے والا جلسہ مرکزی، صوبائی اور ضلعی سطح کا نہیں بلکہ صرف حلقے کے عوام کا جلسہ ہوگا اور مجھے یقین ہے کہ یہ تحریک انصاف کے فلاپ شو سے بڑا جلسہ ہوگا۔ دوسری جانب دوسری جانب وزیر خارجہ اور پیپلز پارٹی کے چیئرمین بلاول بھٹو زرداری نے چیئرمین تحریک انصاف عمران خان کے تمام اسمبلیوں سے استعفے دینے کے اعلان پر ردعمل دے دیا۔بلاول بھٹو زرداری نے ٹوئٹر پر جاری اپنے بیان میں کہا کہ راولپنڈی میں پی ٹی آئی کو فلاپ شو کا سامنا کرنا پڑا، عمران خان انقلاب کے ہجوم کو کھینچنے میں ناکام رہے۔ وزیر خارجہ نے کہا: ’عمران خان نئے سربراہوں کی تقرریوں کو کمزور کرنے میں ناکام رہے۔ انہوں نے مایوسی میں استعفوں کا ڈرامہ رچایا۔‘انہوں نے مزید کہا کہ عمران خان کا پنڈی سے مطالبہ آزادی نہیں بلکہ دوبارہ منتخب ہونے کا ہے۔بلاول بھٹو نے سوال اٹھایا کہ کب تک خیبر پختونخوا اور پنجاب کو سیاسی سہارے کے طور پر استعمال کیا جائے گا؟ دوسری جانب وزیر داخلہ راناثنا اللہ نے چیئرمین پی ٹی آئی عمران خان کے تمام صوبائی اسمبلیاں توڑنےکے اعلان کے بعد نجی ٹی وی چینل کے پروگرام میں گفتگو کرتے ہوئے کہا کہ پنجاب میں تحریک عدم اعتماد لا سکتے ہیں، جس کے بعد اسمبلی نہیں توڑی جا سکے گی۔ رانا ثنا اللہ نے کہا کہ عمران خان کا پارلیمانی سسٹم میں چلنے کا رویہ ہی نہیں ہے۔ انہوں نے کہا کہ مذاکرات غیر مشروط ہوتے ہیں اور آگے بڑھتے ہیں۔ اسمبلیاں توڑنے کا اعلان عمران خان کا اعلان شکست ہے۔ رانا ثنااللہ نے مزید کہا کہ آج وہ لوگوں کا سمندر لانا چاہتے تھے، لیکن کامیاب نہیں ہوئے۔

واضح رہے کہ پاکستان تحریک انصاف کے چیئرمین عمران خان نے کہا ہے کہ یہ غیر ملکی قبضہ گروپ ہے، خون کے آخری قطرے تک ملک کیلئے لڑوں گا، آزادی کوئی پلیٹ میں رکھ کر نہیں ملتی لڑنا پڑتا ہے، تاریخ گواہی دے گی کہ عمران خان اپنے ملک کیلئے آخری گیند تک لڑتا رہا، کبھی نہیں سوچا کہ پاکستان کے علاوہ میرا کوئی گھر ہو۔ راولپنڈی میں پی ٹی آئی کے حقیقی آزادی مارچ کے شرکاء سے خطاب میں انہوں نے کہا کہ بار بار سنتے ہیں سائفر ایک ڈرامہ تھا، جو بیرونی سازش کا حصہ تھے انہوں نے سائفر کو ڈرامہ قرار دیا، یہ کہنا کہ یہ ڈرامہ تھا یہ ملک کی توہین ہے، سازش نہیں بھی کی تھی تو ان کا راستہ نہیں روکا گیا، چوروں کا ٹولہ اوپر بٹھا دیا گیا، سب کو باری باری این آر او دیا گیا، مشرف نے پہلا این آر او دیا تو ہمارا قرض بڑھ گیا، یہ واپس آئے اور دونوں ہاتھوں سے ملک کو لوٹا، جو لوگ جیل میں ہیں ان کا قصور صرف یہ ہے کہ وہ غریب ہیں۔ سابق وزیر اعظم نے کہا کہ ایف آئی اے میں اپنا آدمی بٹھا کر سارے کیسز معاف کروا لیے گئے، نیب میں اپنا آدمی بٹھا کر وہاں سے بھی کیسز معاف کروا لیے، 7مہینے میں انہوں نے ملک کادیوالیہ نکال دیا، 7مہینے میں اشیائے خورونوش کی قیمتیں 100فیصد بڑھی ہیں، 88 فیصد سرمایہ کاروں کو حکومت پر کوئی اعتماد نہیں ہے، ہمارے دور میں ڈیفالٹ کے چانسز 5 فیصد تھے۔ انہوں نے کہا کہ انہوں نے سمجھا پی ٹی آئی کی حکومت گرائیں گے تو پارٹی ٹوٹ جائے گی لیکن حکومت گرانے کے بعد اور زیادہ لوگ ہمارے ساتھ آ گئے، جتنے ضمنی الیکشن ہوئے قوم نے بار بار پیغام دیا، قوم کی آواز سننے کی بجائے ہم پر تشدد شروع ہو گیا، ہمارا لوٹا ن لیگ کے ٹکٹ پر الیکشن لڑے گا، ظلم اور ناانصافی کو قبول کریں گے تو آگے تباہی ہے، پاکستان میں طاقتور میں کے لیے کوئی قانون نہیں، انسانی حقوق کی خلاف ورزی پر کوئی ایکشن نہیں ہوتا، میں چاہتا ہوں پاکستان ترقی کرے۔