امریکی سازشی بیانیہ سے دستبرداری، واشنگٹن سے دوستی عمران کا میگا یوٹرن ہے، پی ڈی ایم رہنما کی تنقید

پشاور(آئی این پی)پاکستان ڈیموکریٹک موومنٹ (پی ڈی ایم)کے ترجمان حافظ حمد اللہ نے کہا ہے کہ امریکی سازشی بیانیے سے محض دستبرداری کافی نہیں، عمران خان کو جھوٹ کا جواب دینے کے ساتھ قوم اور ریاست سے معافی مانگنی ہو گی، عمران خان کے انٹرویو پر ردعمل میں سماجی رابطے کی سائٹ ٹوئٹر پر جاری کیے گئے بیان میں حافظ حمد اللہ نے کہا کہ امریکی سازشی بیانیہ سے دستبرداری، واشنگٹن سے دوستی عمران کا میگا یوٹرن ہے، وہ سائفر کو بنیاد بنا کر 7 ماہ پاکستانی قوم کے جذبات سے کھیلتے رہے،

انہوں نے پاکستان کی آزادی، خودمختاری، خودداری اور سالمیت کو داو پر لگایا،انہوں نے کہا کہ عمران خان نے پاکستان کو دنیا میں تنہا اور رسوا کر کے تماشا بنادیا، انہوں نے سائفر ہاتھ میں ہلا ہلا کر جھوٹ بولا اور قوم کو بیوقوف بنایا، کیا تم نے ریاست کو کھلونا اور قوم کو بھیڑ بکریوں کا ریوڑ سمجھ رکھا ہے؟حافظ حمد اللہ کا کہنا تھا کہ ایک دن امریکی سازشی بیانیہ دوسرے دن سپریم کورٹ سے تحقیقات کا مطالبہ، یہ جھوٹ، ڈرامے بازی اور منافقت نہیں چلے گی، آپ کا محاسبہ ضروری ہے، نیا پاکستان، ریاست مدینہ، غلامی نامنظور، حقیقی آزادی کے جھوٹے نعروں پر قوم مزید اعتماد نہیں کرے گی۔