لاہور(پی این آئی) آزادی مارچ کے دوران راوی پل سے گرکر جاں بحق ہونے والے پی ٹی آئی کارکن فیصل عباس کی قبر کشائی کی درخواست جمع کرادی گئی ۔فیصل عباس کی اہلیہ کی جانب سے قبر کشائی کی درخواست کینٹ کچہری میں جمع کرائی گئی، جس پر عدالت نے پولیس سے جواب طلب کرلیا ہے۔درخواست میں فیصل عباس کی بیوہ نے موقف اپنایا کہ اپنے شوہ کی موت کی وجوہات جاننے کیلئے پوسٹ مارٹم کرواناچاہتی ہوں، مجھے خدشہ ہے کہ رانا ثنااللہ،حمزہ شہباز،
سی سی پی او سمیت دیگر کی ایما پر میرے شوہر کو مارا گیا۔درخواست میں موقف اپنایا گیا کہ عینی شاہدین کے مطابق پولیس غفلت کے باعث شوہر گر کر جاں بحق ہوا، میری عدالت سے استدعا ہے کہ عدالت قبر کشائی کاحکم دے تاکہ موت کی وجوہات کاعلم ہوسکے۔واضح رہے کہ لانگ مارچ کے دوران لاہور سے اسلام آباد جاتے ہوئے راوی پل سے نیچے گر کر تحریک انصاف کے کارکن فیصل عباس کی موت ہو گئی تھی، تحریک انصاف کا دعوی ہے کہ پولیس اہلکاروں نے فیصل عباس کو پل سے نیچے گرایا۔
تازہ ترین خبروں کے لیے پی این آئی کا فیس بک پیج فالو کریں
