لاہور (پی این آئی) ماہ ذوالقعدہ کا آغاز، پاکستان میں عید الاضحیٰ کی ممکنہ تاریخ بتا دی گئی۔ تفصیلات کے مطابق پاکستان میں ماہ شوال کا اختتام ہونے کے بعد عید الاضحیٰ کی آمد میں کم وقت باقی رہ گیا ہے۔ نجی ٹی وی چینل سٹی 42 نیوز کی رپورٹ کے مطابق ملک میں عید قربان 10 جولائی بروز اتوار کو ہونے کا امکان ہے، جبکہ خلیجی ممالک میں عید الاضحیٰ 09 جولائی کو ہونے کی پیشن گوئی کی جا چکی۔
گزشتہ روز ملک میں ذوالقعدہ کا چاند نظر آ گیا تھا۔ یوں ملک میں ماہ شوال کا اختتام ہوا اور عید الاضحٰی کی آمد میں اب ڈیڑھ ماہ سے بھی کم وقت باقی رہ گیا۔ میڈیا رپورٹس کے مطابق ماہ ذوالقعدہ کا چاند دیکھنے کیلئے مرکزی رویت ہلال کمیٹی کا اجلاس منگل کی شام کو طلب کیا گیا۔اجلاس کی صدارت چئیرمین رویت ہلال کمیٹی مولانا عبدالخبیر آزاد کی جانب سے کی گئی۔اجلاس کے دوران ملک کے مختلف علاقوں سے شاند کی شہادتیں موصول ہوئیں۔ شہادتوں کی تصدیق کیے جانے کے بعد اعلان کیا گیا کہ ملک میں ماہ ذوالقعدہ 1443 ھجری کا آغاز یکم جون بروز بدھ سے ہو گا۔ اس سے قبل عید قربان کی آمد میں ڈیڑھ ماہ سے کم وقت باقی رہ جانے پر متحدہ عرب امارات سے تعلق رکھنے والے معروف ماہر فلکیات ابراہیم الجروان کی جانب سے عید الاضحیٰ کی تاریخ کے حوالے سے پیشن گوئی کی گئی۔
ابراہیم الجروان کے مطابق متحدہ عرب امارات میں یومِ عرفہ 8 جولائی جبکہ عید الاضحیٰ 9 جولائی بروز ہفتہ کو ہونے کا امکان ہے۔ واضح رہے کہ ابراہیم الجروان نے حالیہ کچھ برسوں کے دوران عید اور رمضان المبارک کے چاند کی رویت کے حوالے سے اپنی درست پیشن گوئیوں سے خاصی شہرت حاصل کی ہے۔ ابراہیم الجروان نے گزشتہ سال ہی رواں سال کے رمضان المبارک اور عید الفطر کی تاریخوں کی پیشن گوئیکی تھی۔ یہاں واضح رہے کہ خلیجی ممالک خاص کر متحدہ عرب امارات میں ہجری مہینوں کے چاند کی رویت کے حوالے سے اب ٹیکنالوجی کی ہر ممکن مدد لی جاتی ہے۔ ٹیکنالوجی کی مدد سے ہی متحدہ عرب امارات میں عیدین، حج اور رمضان المبارک کی تاریخیں پہلے سے ہی بتا دی جاتی ہیں۔
تازہ ترین خبروں کے لیے پی این آئی کا فیس بک پیج فالو کریں
