’’عمران خان ڈرامے باز ہے اس خط کی کاپی تو میرے پاس بھی ہے ‘‘

اسلام آباد (پی این آئی )اسلام آباد پریڈ گرائونڈ میں گزشتہ رات وزیراعظم عمران خان نے جلسے میں ایک خط لہرا کر کہا تھا کہ انہیں تحریری دھمکی دی گئی ہے اس حوالے سے سینئر صحافی نجم سیٹھی نے کہا ہے کہ یہ خط پبلک ڈومین ہے اور اس کی خفیہ کاپی میرے پاس بھی موجود ہے ۔ سماجی رابطے کی ویب سائٹ ٹویٹر پر سینئر صحافی نجم سیٹھی نے کہا ہے کہ عمران خان نے جو خط پریڈ گرائونڈ کے جلسے میں لہرا یا تھا اس کی خفیہ کاپی میرے پاس بھی موجود ہے ،

یہ خط پبلک ڈومین ہے،دراصل یہ خط پبلک ڈومین پر دستیاب ہے، عمران خان ایک ڈرامے باز ہے جو مائنڈ گیمز کھیلتا ہے۔”واضح رہے کہ گزشتہ روز پاکستان تحریک انصاف کے جلسے سے خطاب میں طویل انتظار کے بعد وزیراعظم عمران خان نے خط نکال کر سرپرائز بتادیا۔جلسے میں وزیراعظم کے سرپرائز کا لوگ ڈیڑھ گھنٹے تک انتظار کرتے رہے، آخر میں وزیراعظم نے سرپرائز کھول کر بتا دیا، جیب سے خط نکال کر دکھایا کہ ملکی مفاد کا کہہ کر دھمکیاں دی جارہی ہیں۔

وزیراعظم نے کہا کہ ہم ملکی مفاد پر کوئی سمجھوتا قبول نہیں کریں گے، آج پھر وہی سازش ہورہی ہے جو بھٹو کے خلاف ہوئی، سازش کا ہمیں تین ماہ سے پتا ہے، باہر سے ہماری حکومت تبدیل کرنے کی کوشش کی جارہی ہے۔انہوں نے جیب سے خط نکال کر لہراتے ہوئے کہا کہ وہ الزام نہیں لگا رہے، ان کے پاس خط کی صورت میں ثبوت ہے، بہت سی باتیں ہیں، بہت جلد اور مناسب وقت پر سامنے لائی جائیں گی، لندن میں بیٹھا ہوا شخص کس کس سے ملتا ہے،

پاکستان میں بیٹھے کردار کس کے کہنے پر چل رہے ہیں۔عمران خان نے کہا کہ پیسا باہر سے آرہا ہے، ہمارے لوگ استعمال ہو رہے ہیں، زیادہ تر انجانے میں تاہم کچھ جان بوجھ کر یہ پیسا ہمارے خلاف استعمال کر رہے ہیں، جب پارلیمنٹ میں ووٹنگ ہوگی تو قوم سب کو دیکھے گی۔