میٹرو بس سروس غیر معینہ مدت کیلئے بند کر دی گئی، وجہ کیا بنی

اسلام آباد (پی این آئی) اسلام آباد میٹرو بس سروس غیر معینہ مدت کیلئے بند کر دی گئی۔ تفصیلات کے مطابق وفاقی دارالحکومت اسلام آباد میں آئندہ چند روز کے دوران سیاسی جماعتوں کے جلسوں اور ریلیوں کے باعث ضلعی انتظامیہ کی جانب سے اہم فیصلہ کیا گیا ہے۔ اے آر وائی نیوز کے مطابق وفاقی دارالحکومت میں سیاسی جماعتوں کے جلسوں اور موجودہ سیاسی صورتحال کے باعث میٹرو بس سروس کو بند رکھنے کا فیصلہ کیا گیا ہے۔

اسلام آباد میں میٹرو بس سروس غیر معینہ مدت کیلئے بند رہے گی۔ دوسری جانب اسلام آباد میں جلسوں اور مارچ کے پیش نظر سیکیورٹی بڑھا دی گئی، کنیٹینرز بھی پہنچ گئے۔ حکومت اور اپوزیشن کے جلسوں اور مارچ کی سیکیورٹی اور روٹس کے لئے اسلام آباد انتظامیہ اور وزارت داخلہ نے تیاریاں مکمل کر لی ہیں دارالحکومت اسلام آباد میں مختلف مقامات پر کنٹینرز رکھ دیئے گئے ہیں تاہم ابھی سڑکوں پر ٹریفک کی روانی معمول کے مطابق جاری ہے ۔اسلام آباد میں جلسوں اوراحتجاج کے پیش نظر پنجاب اور خیبرپختونخوا سے پولیس کی اضافی نفری لانے کا فیصلہ بھی کیا گیا ہے۔ وزارت داخلہ کے مطابق رینجرز اور ایف سی کی اضافی نفری بھی بلائی جائے گی۔ وزیر داخلہ شیخ رشید نے کہا ہے کہ جلسوں سے شہریوں کی نقل و حرکت میں رکاوٹ نہیں آنی چاہیے، یقینی بنایا جائے کہ جلسے مختص کردہ مقام پر ہی ہوں۔

جبکہ اسلام آباد کی سیکورٹی کے حوالے سے آئی جی اسلام آباد محمد احسن یونس کی زیر صدارت اہم اجلاس ہوا جس میں چاروں زونل ایس پیز اور ایس ایس پی سید علی اکبر شریک ہوئے۔ اجلاس میں حکومتی اور اپوزیشن کے جلسوں کی سیکیورٹی سے متعلق انتظامات کو حتمی شکل دے دی گئی۔اسلام آباد پولیس کے مطابق 2ہزار سے زائد پولیس اور سیکیورٹی اداروں کے اہلکارجلسے جلوس اور ریلیوں کے راستوں پر تعینات ہوں گے۔ اہم شاہراہوں پر ٹریفک کی روانی کو بھی برقرار رکھا جائے گا۔