پیٹرول اور بجلی سستی کرنے کے بعد آج وزیراعظم کونسی بڑی خوشخبری سنائیں گے؟ اعلان کر دیا گیا

لاہور ( پی این آئی ) وزیراعلیٰ پنجاب کے معاون خصوصی برائے اطلاعات حسان خاور کا کہنا ہے کہ وزیراعظم عمران خان آج صنعتکاروں کے لیے پیکج کا اعلان کریں گے۔حسان خاور نے پنجاب کابینہ اجلاس میں کیے گئے فیصلوں کے حوالے سے میڈیا بریفنگ میں بتایا کہ وزیراعظم آج صنعتکاروں کے لیے پیکج کا اعلان کریں گے۔

پٹرول کی قیمتوں میں کمی کرکے وزیراعظم نے ثابت کیا کہ حالات کیسے بھی ہوں وہ عوام کے ساتھ ہیں۔وزیراعظم نے صحیح کہا جہاں وزیراعظم کو انصاف میں وقت گلے گا تو عام شہری کا کیا حال ہو گا۔حسان خاور نے کہا کہ کابینہ نے پنجاب سول سرونٹ ایکٹ میں ترمیم کی تھی اس فیصلے کے تحت نوکریوں میں جنوبی پنجاب کا 33 فیصد کوٹہ مقرر کیا گیا۔انہوں نے مزید کہا کہ کابینہ اجلاس میں سہولت بازار اتھارٹی قائم کرنے کا فیصلہ کیا گیا جس کے چئیرمین وزیراعلیٰ ہوں گے۔واضح رہے کہ پیر کے روز وزیر اعظم عمران خان کی جانب سے قوم سے اہم خطاب کیا گیا۔ قومی میڈیا پر نشر ہونے والے خطاب میں وزیر اعظم نے قوم کیلئے خصوصی پیکج کا اعلان کیا۔

وزیر اعظم نے کہا کہ قوم سے کہنا چاہتا ہوں مجھے پتا ہے یہ مشکل حالات ہیں، کبھی پلوامہ، کبھی کورونا اور اب یوکرین کا مسئلہ آگیا۔ حکومت ہرماہ 70 ارب کی سبسڈی دیتی ہے، اگر ہم سبسڈی نہ دیں تو پٹرول کی قیمت 220 روپے تک ہو جائے گی۔پاکستان میں آج بھی پٹرول، ڈیزل دنیا کے 25 ممالک کی نسبت کم قیمت ہے،بھارت میں 260 روپے لیٹر پٹرول ہے۔ اپوزیشن والے کہتے ہیں پٹرول مہنگا ہوگیا اگر ان کے پاس کوئی حل ہے تو بتا دیں۔ وزیر اعظم نےاعلان کیا کہ پٹرول اور ڈیزل کی قیمت میں 10 روپے، بجلی کی فی یونٹ قیمت میں 5 روپے کمی کا فیصلہ کیا گیا ہے۔ اگلے بجٹ تک پٹرولیم مصنوعات اوربجلی کی قیمتوں میں اضافہ نہیں ہوگا۔وزیر اعظم نے کہا کہ احساس پروگرام کے تحت 12 ہزار کی بجائے اب 14 ہزار روپے ملیں گے۔ بے روزگار گریجوئٹس کو اسکالرشپس ملیں گی، دوران انٹرنشپ 30 ہزار روپے ماہانہ ملیں گے، 26 لاکھ اسکالرشپس پر 38 ارب روپے خرچ کر رہے ہیں، تمام اسکالرشپس میرٹ پر دے رہے ہیں۔

آئی ٹی سیکٹر پر، فارن ایکسچینج پر 100 فیصد ٹیکس معاف کر دیا گیا۔ وزیر اعظم نے اعلان کیا کہ نوجوانوں اورکسانوں کو بلا سود قرضے ملیں گے۔کل لاہور میں انڈسٹریل پیکج کا اعلان کروں گا، جو بھی انڈسٹری لگائے گا اس سے آمدن سے متعلق نہیں پوچھا جائے گا۔ انہوں نے کہا کہ گھر بنانے کیلئے سستے قرضے دیئے جائیں گے۔ پہلے بینک چھوٹے طبقے کو قرضے نہیں دیتے تھے، قرض لینے کے لیے بینکوں میں آسانی پیدا کردی ہے، گھروں کے لیے 50 ارب روپے کے قرضے دے چکے ہیں، چھوٹے طبقے کو گھر بنانے کیلئے 2 سال میں 407 ارب روپے کے قرضے ملیں گے۔