اسلام آباد(پی این آئی)وفاقی وزیر داخلہ شیخ رشید نے کہا ہے کہ سابق وزیراعظم نواز شریف جعلی میڈیکل رپورٹ کی بنیاد پر لندن گئے اور وہاں قیام کرنا چاہتے ہیں، دنیا میں کوئی ایسا لیڈر نہیں جو اپنے ملک سے بھاگ کر کسی دوسرے ملک میں جعلسازی سے قیام پذیرہو. اسلام آباد میں پریس کانفرنس سے خطاب کرتے ہوئے انہوں نے کہا کہ ان کی میڈیکل رپورٹ میں کہا گیا کہ عالمی وبا کورونا وائرس کی وجہ سے وہ علاج نہیں کراسکے جبکہ عوام کو کہتے ہیں کہ کورونا میں جلوس کی صورت میں اسلام آباد جا ؤ لوگوں کو بیماری میں دھکیلنا چاہتے ہیں اور خود اپنی صحت اتنی عزیز ہے۔
وزیر داخلہ نے کہا کہ اپوزیشن اسلام آباد آکر اپنا شوق پورا کرلے، ان کے تلوں میں تیل نہیں ہے آپ 27 فروری اور 23 مارچ کو دیکھ لیے گا مولانا فضل الرحمان کا بہت شوق ہے انہیں پتہ چل جائے گا کتنے لوگ ان کے ساتھ ہیں. انہوں نے کہا کہ مولانا نے عمران خان کو اشرف غنی سے ملایا، حالانکہ عمران خان پہلے بھی طالبان کی حمایت اور ڈرون حملوں کی مخالفت میں بولتے تھے جس کے لیے اپنے اوپر طالبان خان کا لیبل لگوالیا، عمران خان وہ واحد فرد ہے کہ جو آج بھی افغانستان میں انسانی مسائل پر آواز اٹھا رہے ہیں۔انہوں نے کہا کہ ایک سال کے عرصے میں نیشنل ڈیٹا بیس اینڈ رجسٹریشن اتھارٹی (نادرا) کے 87 نئے سینٹرز کھولے گئے جن میں سے سندھ میں 23، پنجاب میں11، خیبرپختونخوا میں 16، بلوچستان میں 13، آزاد کشمیر میں 13، گلگت بلتستان میں 10 اور اسلام آباد میں ایک مرکز کھولا گیا وزیر داخلہ نے کہا کہ رواں سال بیرونِ ملک 13 نئے نادرا سینٹرز کھولے جائیں گے۔
انہوں نے بتایا کہ سندھ میں 13 مقامات کی نشاندہی کی گئی ہے یہاں ہم پاسپورٹ سینٹرز قائم کرنا چاہتے ہیں، جس کے لیے ہمارے پاس فنڈز موجود ہیں لیکن سندھ حکومت کی جانب سے تاخیر کی جارہی ہے وزیر داخلہ نے کہا کہ تمام چیف سیکرٹریوں اور آئی جی صاحبان کوخط لکھ کر اور فون کر کے امن و امان کی صورتحال کے حوالے سے الرٹ رہنے اور ہر قسم کی صورتحال کے لیے بہتر منصوبہ بندی کرنے کی ہدایت کی گئی ہے۔انہوں نے کہا کہ روزبروز افواہیں اڑائی جارہی ہیں، ملک میں کوئی صدارتی نظام آرہا ہے نہ ایمرجنسی لگ رہی ہے اور نہ ہی کوئی ڈیل اور ڈھیل دی جارہی ہے نہ ہی کوئی تحریک عدم اعتماد لائی جارہی ہے انہوں نے کہا کہ جو ساڑھے 3 سال میں کوئی ایسا بل نہیں ہے جس پر حکومت کو سینیٹ یا قومی اسمبلی میں کامیابی نہ ملی ہو. کالعدم تحریک طالبان کی جانب سے ایک بیان میں 42 حملوں کے دعوے سے متعلق سوال کے جواب میں انہوں نے تسلیم کیا کہ ٹی ٹی پی کے حملوں میں اضافہ ہوا ہے انہوں نے بتایا کہ ہمیں 3 سے 4 وارداتوں کا سراغ مل گیا ہے وفاقی تحقیقاتی ادارے (ایف آئی اے) میں تبادلوں سے متعلق سوال کے جواب میں ان کا کہنا تھا کہ تبادلے ڈی جی ایف آئی اے نے کیے ہوں گے جنہیں صرف وزیراعظم روک سکتے ہیں انہیں کون سے وزرا روکنا چاہتے ہیں اس کا مجھے علم نہیں ہے انہوں نے کہا کہ تمام اداروں کے سربراہان بااختیار ہیں۔
اگر کوئی تبادلے ہوئے ہیں تو یہ ان کی صوابدید ہیں۔وزارت اطلاعات کا منصب دیے جانے سے متعلق سوال پر انہوں نے کہا کہ میں وزارت داخلہ میں خوش ہوں، مجھ سے کسی نے کوئی بات نہیں کی، اگر کسی نے کی تو میں اپنی گزارش کروں گا شیخ رشید نے کہا کہ روزانہ علاج اور دیگر مقاصد سے یومیہ تقریباً 500 افراد افغانستان سے آتے ہیں، آنے اور جانے والوں کے تناسب سے پاکستان میں ایک لاکھ 7 ہزار افغان شہری زیادہ ہیں۔ایک اور سوال کے جواب میں انہوں نے کہا کہ کون سی حکومت آئی ایم ایف کے پاس نہیں گئی، آئی ایم ایف کے پاس مجبوری میں جانا پڑتا، عمران خان کی حکومت پہلی نہیں جو آئی ایم ایف گئی انہوں نے کہ کل وزیراعظم عمران خان کل چین کے دورے پر روانہ ہورہے ہیں، موجودہ عالمی اور خطے کی صورتحال، سی پیک کے معاملات اور چین کے پاکستان کے تعلقات سے متعلق معاملات طے پائیں جو تاریخی دورہ ہوگا۔
تازہ ترین خبروں کے لیے پی این آئی کا فیس بک پیج فالو کریں
