بلوچستان عوامی پارٹی کے ناراض اراکین کا وزیراعلیٰ جام کمال سے استعفے کا مطالبہ، آج شام تک کی ڈیڈلائن

کوئٹہ /کراچی (آئی این پی)بلوچستان عوامی پارٹی (بی اے پی)کے ناراض اراکین صوبائی اسمبلی اور وزرا اور اتحادیوں کی جانب سے بلوچستان کے وزیراعلی جام کمال عالیانی سے آج بدھ کی شام 6 بجے تک استعفیٰ دینے ڈیڈلائن دے دی۔نجی ٹی وی کی رپورٹ کے مطابق صوبائی اراکین اسمبلی کی جانب سے یہ مطالبہ جام کمال کی جانب سے بلوچستان عوامی پارٹی کی صدارت سے استعفے کے بعد سامنا آیا ہے جہاں جام کمال کو چند صوبائی

وزرا اور پارٹی کے اراکین اسمبلی کی مخالفت کا سامنا ہے اور وزیراعلیٰ سے استعفے کا مطالبہ کر رہے ہیں۔ نجی ٹی وی کی رپورٹ کے مطابق بلوچستان عوامی پارٹی کے ناراض اراکین کا موقف ہے کہ وہ جام کمال عالیانی کے ساتھ کام نہیں کرنا چاہتے ہیں۔بلوچستان کے وزیر خزانہ ظہور بلیدی نے دیگر ناراض اراکین کے ہمراہ کوئٹہ میں منگل کو پریس کانفرنس کرتے ہوئے کہا کہ بلوچستان عوامی پارٹی کے 14 سے 15 اراکین اور دیگر اتحادی جماعتوں کے چند اراکین نے وزیراعلی پر عدم اعتماد کا اظہار کیا ہے۔انہوں نے کہا کہ ‘اس عدم اعتماد کی وجہ صوبے میں بڑھتی ہوئی بے چینی ہے ۔ظہور بلیدی کا کہنا تھا کہ جام کمال کو پہلے ہم نے وزارت اعلیٰ سے استعفے کے لیے دو ہفتے دیے تھے لیکن ‘استعفی دینے کے بجائے وہ سوشل میڈیا میں یہ تاثر دینے کی کوشش کی کہ ہمارے درمیان اختلافات ہیں ۔انہوں نے جام کمال کی ان ٹوئٹس کا حوالہ دیا، جس میں انہوں نے

کہا تھا کہ ‘بلوچستان عوامی پارٹی ہماری جماعت ہے اور ان شااللہ ہم اپنے مسائل خود حل کریں گے، میں دوبارہ کہوں گا کہ یہ پاکستان کی سب سے زیادہ جمہوری جماعت ہے۔ان کا کہنا تھا کہ ‘اختلافات ہوتے ہیں، ہم ان پر بات کرتے ہیں، بحث ہوتی ہے اور الحمداللہ اس کو حل بھی کرتے ہیں۔جام کمال نے کہا تھا کہ 3 اکتوبر تک پارٹی کے 6 اراکین سے بہت اچھے ماحول میں مل چکا ہوں اور ان شااللہ ہم ان تمام مسائل کو حل کرلیں گے۔انہوں نے کہا کہ ‘چند افراد انفرادی طور پر اختلافات پیدا کرنا چاہتے ہیں اور چاہتے ہیں کہ ہم ایک دوسرے کو ردعمل دیں لیکن الحمداللہ ہم سب نے بڑی ذمہ داری اور ایک دوسرے سے احترام کا مظاہرہ کیا ہے ۔ظہور بلیدی نے اپوزیشن کی جانب سے رواں ماہ کے اوائل میں جمع کرائی گئی عدم اعتماد کی تحریک کا بھی حوالہ دیا اور کہا کہ اس طرح کے ماحول میں وزیراعلی کے لیے بہتر ہے کہ وہ استعفیٰ دے دیں۔بلوچستان کے وزیر برائے سماجی بہبود میر اسداللہ بلوچ کا کہنا تھا کہ جام کمال عالیانی صوبائی حکومت میں اتحادیوں سے کیے گئے وعدے پورے کرنے میں ناکام ہوگئے ہیں اور ان سے استعفے کا مطالبہ صوبے کے وسیع ترمفاد میں کیا جارہا ہے۔انہوں نے کہا کہ ‘جام کمال کو آج شام 6 بجے تک وقت دیا جائے گا، اگر وہ آج بدھ تک مستعفی نہیں ہوں گے تو عدم اعتماد کی تحریک سمیت دیگر آپشنز پر غور کیا جائے گا۔رکن صوبائی اسمبلی نصیب اللہ مری نے بھی اس موقع پر زور دیا کہ جام کمال مستعفی ہوجائیں۔انہوں نے کہا کہ وزیراعلیٰ سے درخواست کی جاتی ہے کہ وہ پارٹی اور صوبے پر رحم کریں اور استعفیٰ دے دیں۔خیال رہے کہ بلوچستان میں سیاسی بحران پہلی مرتبہ رواں برس جون میں اس وقت شروع ہوا تھا جب اپوزیشن نے صوبائی اسمبلی کے باہر جام کمال کی قیادت میں کام کرنے والی حکومت کے خلاف کئی دنوں تک احتجاجی مظاہرہ کیا تھا جو ان کے حلقوں میں ترقیاتی کاموں کے لیے بجٹ میں فنڈز مختص کرنے کے حوالے سے تھا۔احتجاج بعد میں شدت اختیار کر گیا تھا اور پولیس نے اس واقعے کے حوالے سے اپوزیشن کے 17 اراکین کو مقدمے میں نامزد کردیا تھا۔بعد ازاں اپوزیشن نے جام کمال کے خلاف عدم اعتماد کی تحریک جمع کروائی تھی-اس سے پہلے خبریں آئی تھیں کہ جام کمال کو پارٹی کے اندر بھی بعض معاملات پر مخالفت کا سامنا ہے، خاص کر برتیوں اور تبادلوں پر وزرا کے اختیارات اور ان کو ترقیاتی فنڈز مختص کرنے کے حوالے سے اختلاف پایا جاتا ہے۔رپورٹ میں بتایا گیا تھا صوبائی وزیر بلدیات سردار محمد صالح بھوتانی نے وزیراعلی سے اختلافات پر استعفیٰ دے دیا تھا اور دوسری طرف پاکستان تحریک انصاف(پی ٹی آئی)کے صوبائی پارلیمانی لیڈر سردار یار محمد رند نے بھی ہائر ایجوکیشن کی وزارت سے استعفی دیا تھا اور صوبائی اسمبلی میں وزیراعلی سے اختلافات پر تلخ تقریر کی تھی۔بلوچستان عوامی پارٹی میں اختلافات کے باعث جام کمال نے گزشتہ ہفتے پارٹی کی صدارت سے استعفیٰ دے دیا تھا۔اس کے بعد بلوچستان عوامی پارٹی کی کور کمیٹی کا اجلاس طلب کیا گیا تھا، جہاں صوبے میں سیاسی بحران پیدا ہونے کے شدید خدشات کا اظہار کیا گیا تھا اور حالات اس نہج پر ناراض اراکین کی وجہ سے پہنچے اور جام کمال سے استعفے کا مطالبہ کردیا۔