افغانستان میں موجود کالعدم اور دہشت گرد تنظیموں کی طرف سے حملوں کا خدشہ ہے

اسلام آباد(آئی این پی) وفاقی وزیر داخلہ شیخ رشید احمد نے کہاہے کہ پاکستان افغانستان کی بہتری ،امن کیلئے کردارادا کرتا رہے گا ،افغانستان میں کالعدم اور دہشت گرد تنظیمیں موجود ہیںجن کی طرف سے حملوں کا خدشہ ہے ، ہمارے ادار ے مکمل الرٹ ہیں ، ہم بھارت کے ساتھ بھی اچھے تعلقات چاہتے ہیں،بھارت کے ساتھ مسئلہ کشمیر کا حل چاہتے ہیں ، بھارت میں مذہبی دہشتگردی ہورہی ہے اور وہاں مسلمانوں کا جینا محال

ہوگیا ہے، پاکستان خطے میں امن چاہتا ہے ،پاکستان کے روس ،افغانستان ،ایران سے بھی اچھے تعلقات ہیں ،موجودہ حکومت مہنگائی کی وجہ سے تنقید کا نشانہ بن رہی ہے تاہم پچھلی حکومتوں کے جان بوجھ کر تیل اور گیس کے مہنگے معاہدوں کے باعث ملک میں مہنگائی کی شدت ہے،عمران خان ایک ایماندار لیڈر ہے اس نے کبھی کرپشن نہیں کی ، عمران خان ایک فائٹر ہے وہ لڑے گا ،عمران خان حکومت میں پانچ سال پورے کرے گا ، اگلا الیکشن عمران خان الیکٹرانک ووٹنگ مشین پرکرائے گا ، عمران خان کے ساتھ آیا ہوں اور انہی کیساتھ رہوں گا ، (ن)لیگ الیکشن سے پہلے تین گروپوں میں تقسیم ہوجائے گی ،ن ش کے بعد تیسرا گروپ نکلنے والا ہے ۔جمعرات کو نجی ٹی وی چینل سے گفتگو کرتے

ہوئے وفاقی وزیر داخلہ شیخ رشید احمد نے کہا کہ پاکستان افغانستان کی بہتری ،امن کیلئے کردارادا کرتا رہے گا ،افغانستان میں کالعدم اور دہشت گرد تنظیمیں موجود ہیں ، خدشہ ہے دہشت گرد پاکستان میں حملے کریں گے لیکن ہمارے ادارے چوکنا ہیں، پاکستان کی افواج دنیا کی عظیم افواج میں سے ایک ہے ،افغانستان میں روس کے خلاف اسلحہ امریکہ اور نیٹو نے متعارف کرایا ،طورخم بارڈر پر پہلی بار بائیومیٹرک مشین نصب کی،افغانستان کے بارڈر پر باڑ لگائی ہے مگردیوار کے متعلق نہیں سوچا ۔ انہوں نے کہا کہ ہم بھارت کے ساتھ بھی اچھے تعلقات چاہتے ہیں،بھارت کے ساتھ مسئلہ کشمیر کا حل چاہتے ہیں ، بھارت میں مذہبی دہشتگردی ہورہی ہے اور وہاں مسلمانوں کا جینا محال ہوگیا ہے ،الیکشن میں بی جے پی نے کسی بھی

مسلمان امیدوار کو ٹکٹ نہیں دی ۔وفاقی وزیر داخلہ نے کہا کہ پاکستان خطے میں امن چاہتا ہے ،پاکستان کے روس ،افغانستان ،ایران سے بھی اچھے تعلقات ہیں ۔شیخ رشید احمد نے کہا کہ مہنگائی ضرور ہے اس میں کوئی شک نہیں ،موجودہ حکومت مہنگائی کی وجہ سے تنقید کا نشانہ بن رہی ہے ،پچھلی حکومتیں تیل اور گیس کے معاہدے جان بوجھ کر مہنگے کر گئیں اسی لئے ملک میں مہنگائی کی شدت ہے ،چار چیزوں کی مہنگائی ہے ،پاکستان میں مافیاز ہیں جو قیمتوں میں ردوبدل کردیتی ہیں ،دال ،آٹا، چینی ، گھی انہی چار چیزوں کا مسئلہ ہے لیکن وزیراعظم عمران خان بہت جلد اس مسئلے پر قابو پا لیں گے ۔انہوں نے کہا کہ دنیا کو بھی پاکستان کے اہم کردارکا ادراک ہے ، نیوزی لینڈ کی ٹیم واپسی پر پاکستانی عوام نے دوپہر کا کھانا نہیں چھوڑا،سب ٹھیک ہو جائے گا ۔انہوں نے کہا کہ ہم پر دنیا نے ذمہ داری ڈالی تو طالبان کو مذاکرات کی میز پر بٹھایا ،بات چیت کی ، ہمیں کسی کے ملک میں مداخلت نہیں ہمیں خود کو ٹھیک کرنا ہے ۔شیخ رشید نے کہا کہ میں کسی کو صفائی دینے کا قائل نہیں ہوں ، عمران خان کے ساتھ آیا ہوں ،ان کیساتھ رہوں گااور انہی کے ساتھ ہی جائوں گا،عمران خان ایک ایماندار لیڈر ہے اس نے کبھی کرپشن نہیں کی ، عمران خان ایک فائٹر ہے وہ لڑے گا ،پانچ سال پورے کرے گا ،میری ذاتی رائے کے مطابق اگلا الیکشن عمران خان الیکٹرانک ووٹنگ مشین پرکرائے گا، عمران خان ای وی ایم اور اوورسیز پاکستانیوں کو ووٹ دینے کے حق سے پیچھے نہیں ہٹے گا ،اوورسیز پاکستانی معیشت کو سہارا دیے ہوئے ہیں ۔شیخ رشید نے کہا کہ میں نوازشریف کی سیاست کو دور دور تک نہیں دیکھ رہا ،کہتے ہیں کلین چٹ مل گئی ہے ،اگر ملی ہے تو واپس پاکستان آجائیں ،شہبازشریف آدھا تیتر اور آدھا بٹیر ہے ، شہبازشریف کوشش کریں تو آئندہ سیاست میں ہوں گے ۔انہوں نے کہا کہ (ن)لیگ الیکشن سے پہلے تین گروپوں میں تقسیم ہوجائے گی ،ن ش کے بعد تیسرا گروپ نکلنے والا ہے ،آنیوالے الیکشن شفاف ہوں گے ، پنجاب میں پی ٹی آئی اور (ن)لیگ کا مقابلہ دیکھ رہا ہوں ، پیپلزپارٹی کا پنجاب میں کوئی چانس نہیں ، انہوں نے خود کو ایک صوبے تک محدود کر رکھا ہے ، بلوچستان میں پی پی تھوڑی بہت سیاست کرے گی ، بلاول بھٹو پتہ نہیں امریکہ کے دورے کیوں کر رہا ہے ۔ایک سوال کے جواب میں انہوں نے کہا کہ چیئرمین نیب نے پہلی مرتبہ بڑے لوگوں پر ہاتھ ڈالا ہے ، حکومت چاہے تو چیئرمین نیب کی مدت ملازمت میں مزید توسیع دے سکتی ہے ، اسمعاملے پر میری وزیراعظم سے بات ہوئی تھی ۔