اسلام آباد (پی این آئی) وفاقی وزیر قانون فروغ نسیم کا کہنا ہے کہ چیئرمین نیب جسٹس (ر) جاوید اقبال کی مدت ملازمت میں توسیع کے بارے میں بات ہو رہی ہے، اس حوالے سے آئندہ چند روز تک فیصلہ کرلیا جائے گا۔
نجی ٹی وی کے پروگرام میں گفتگو کرتے ہوئے فروغ نسیم کا کہنا تھا کہ جسٹس (ر) جاوید اقبال کی کارکردگی بہت اچھی ہے، نئے چیئرمین نیب کےحوالے سے آئندہ چند روزمیں فیصلہ ہوجائے گا۔ چیئرمین نیب کی مدت ملازمت میں توسیع سےمتعلق حتمی فیصلہ نہیں ہوا لیکن جسٹس (ر) جاوید اقبال کی مدت ملازمت میں توسیع سےمتعلق بات ضرور ہورہی ہے۔انہوں نے کہا کہ چیئرمین نیب کی تعیناتی کیلئے آئین کی شق چھ بی ون کے تحت وزیراعظم اور اپوزیشن لیڈرمیں مشاورت ہونی چاہیے۔ چیئرمین نیب کےحوالے سے ایکٹ آف پارلیمنٹ ضرورآئے گا، قانون میں ترمیم آرڈیننس کے ذریعے بھی ہوسکتی ہے،قانون کے حوالے سے ہفتے کے روز تک فیصلہ ہوجائے گا۔خیال رہے کہ جسٹس جاوید اقبال کی بطور چیئرمین نیب تعیناتی کی مدت اگلے ماہ پوری ہوجائے گی۔ انہوں نے 11 اکتوبر 2017 کو اپنے عہدے کا چارج سنبھالا تھا۔
تازہ ترین خبروں کے لیے پی این آئی کا فیس بک پیج فالو کریں
