پی آئی اے کیلئے 20ارب روپے فنڈز حاصل کرنے کا نیا منصوبہ، قومی ائیرلائن کے اثاثوں کو گروی رکھوانے کا فیصلہ کر لیا گیا

اسلام آباد (پی این آئی) وفاقی حکومت کا پی آئی اے کیلئے 20 ارب روپے فنڈز حاصل کرنے کا نیا منصوبہ سامنے آگیا۔ تفصیلات کے مطابق حکومت کی جانب سے قومی ایئرلائن کے لیے 20 ارب روپے فنڈز اکھٹے کرنے کا نیا منصوبہ تیار کیا گیا ہے ، جس کے تحت پی آئی اے کیلئے 20 ارب روپے فنڈز اکٹھے کرنے کے لیے ‘سکوک بانڈز’ کے اجرا کا فیصلہ کیا گیا ہے ، سکوک بانڈز سے حاصل رقم سے پی آئی اے مالی ضرورتیں پورا کرے گی تاہم بانڈز کی ضمانت کے طور پر پی آئی اے کی زمین ، بلڈنگز اور جہازوں کو گروی رکھوایا جائے گا۔بتایا گیا ہے کہ قومی ایئرلائن کے لیے جاری کیے جانے والے سکوک بانڈز کی مدت 10 سال کی ہوگی جب کہ گرین شو آپشن کے تحت مزید 5 ارب روپے کے سکوک بانڈز فروخت کیے جائیں گے ، یہ بانڈز پاکستان اسٹاک ایکس چینج پر بھی لسٹ ہوں گے۔خیال رہے کہ سکوک بانڈز کے اجرا کے ذریعے بڑے پیمانے پر قرض لینے کے لیے سرکاری اثاثوں کو گروی رکھنے کی سمری بالآخر وفاقی کابینہ نے منظور کرلی ، وفاقی کابینہ نے وزارت خزانہ کورواں سال یکم جولائی سے جون 2022ء تک 18سو ارب کاقرض لینے کی اجازت دے دی ہے ، سرکاری اثاثے گروی رکھ کر آئندہ مالی سال میں 1800 ارب کا قرض لیا جائے گا، 3 ایئرپورٹس، 2 موٹرویز، اور اسلام آباد ایکسپریس وے کو گروی رکھا جائے گا۔اس مقصد کیلئے تیار کردہ سمری کے مطابق سکوک بانڈز جاری ہوں گے، قرض لیا جائے گا اور اس کے عوض اسلام آباد، لاہور اور ملتان ائیرپورٹ، ایم تھری اور اسلام آباد چکوال موٹر وے کو گروی رکھا جائے گا کیوں کہ سرکاری اثاثے گروی رکھ کر دیگر ذرائع کے مقابلے میں کم شرح سود پر قرض حاصل کیا جا سکے گا ، سرکاری اثاثے گروی رکھ کر آئندہ مالی سال میں 1800 ارب کا قرض لیا جائے گا۔