مسلم لیگ( ن)کی ایک ہی دن میں 2 اہم وکٹیں گر گئیں

پشاور (این این آئی)صوبائی وزیر محنت و ثقافت شوکت یوسف زئی نے کہا ہے کہ شانگلہ میں مسلم لیگ (ن)کو دھچکالگا ہے اور ایک ہی دن میں ان کی دو اہم وکٹیں گر گئی ہیں’وزیر اعلی محمود خان نے پسماندہ علاقوں کو ترقی دینے کا عزم کیا ہے اور بہت جلد شانگلہ کی محرومیاں بھی ختم ہوں گی’ اب ووٹ کارکردگی پر ملے گا’سڑکیں ،سکول اور صحت کے مراکز بنائیں گے’آئندہ پلاسٹک پائپ پر ووٹ خریدنے والوں کو مایوسی ہوگی۔ان خیالات کا اظہار انہوں نے پیر کے روزملک خیل اچر میں بہت بڑے شمولیتی جلسے سے خطاب کرتے ہوئے کیا ۔ اس موقع پر مسلم لیگ (ن)کی اہم شخصیت فضل خالق خان نے ساتھیوں سمیت اپنی پارٹی سے مستعفی ہو کر تحریک انصاف میں شمولیت کا اعلان کیا۔ فضل خالق خان نے اپنے خطاب میں کہا کہ وہ 40 سال سے زائد مسلم لیگ میں رہے مگر اقتدار میں آنے کے باوجود پارٹی نے علاقے کی ترقی کے لئے کچھ نہیں کیا تحریک انصاف نے کم عرصہ میں شانگلہ میں ترقیاتی کاموں کا جال بچھایا ہے۔ شوکت یوسفزئی نے کہا کہ کہ ملک خیل یوسی مسلم لیگ کا گڑھ تھا لیکن فضل خالق خان اور نعمت خان چیئرمن کی تحریک انصاف میں شمولیت سے اب یہ تحریک انصاف کا گڑھ بنے گا۔عوامی مطالبے پرصوبائی وزیر شوکت یوسف زئی نے بازار کوٹ ٹو نوابے روڈ، بازار کوٹ ٹو اچرسر روڈ، شانگلہ ٹاپ ٹو سوک روڈ اور گاڈوا روڈ کی تعمیر اور درجنوں پینے کے پانی کے منصوبوں کا اعلان کیا اس موقع پر پی ٹی آئی ملاکنڈ ڈویژن کے سینئر نائب صدر سدیدالرحمان خان ضلعی صدر وقار احمد خان سابق امیدوار قومی اسمبلی نواز محمود خان بھی ان کے ہمراہ تھے۔