اسلامی ممالک کو ریاست مدینہ کے بنیادی اصولوںکی طرف جانے کی ضرورت ہے، وزیراعظم

اسلام آباد (آئی این پی)وزیراعظم عمران خان نے کہا ہے کہ ریاست مدینہ کے اصولوں پر جن ممالک نے عمل کیا وہ ترقی کی منازل طے کر گئے، قانون کی برابری اور کمزور طبقے کو اوپر اٹھانا ریاست مدینہ کے بنیادی اصول تھے، آج اسلامی ممالک کو بھی ریاست مدینہ کے بنیادی اصولوں کی طرف جانے کی ضرورت ہے۔جمعرات کو وزیراعظم عمران خان نے مراکش منعقدہ بین الاقوامی سیرت مبارکہ ورچوئل کانفرنس سے خطاب کررہے تھے ۔ مراکش کے دارالحکومت رباط میں عالمی سیرت کانفرنس سے ورچوئل خطاب کرتے ہوئے وزیراعظم عمران خان نے کہاکہ حضرت محمد ؐ نے مضبوط معاشرے کی بنیاد رکھی، 12 سال کی قلیل مدت میں 2 سپر پاورز روم اور فارس نے نئے انقلاب کے سامنے گھٹنے ٹیک دیئے، اسلام کے بنیادی اصولوں پر عمل کرکے مسلمان کامیابی اور کھوئی ہوئی عظمت حاصل کرسکتے ہیں، جن ممالک نے ان اصولوں پرعمل کیا وہ ترقی کرگئے۔ عمران خان نے کہا کہ مدینہ کی ریاست 2 بنیادی اصولوں پرقائم ہوئی، ایک قانون سب کیلئے برابرہوگا اور دوسرا فلاحی ریاست ہوگی، پہلے قومیں اس لیے تباہ ہوئیں کیوں کہ امیر،غریب کیلئے الگ الگ قانون تھا، جن ممالک میں قانون کی حکمرانی نہیں ہوتی اور جنگل کا قانون ہوتا ہے کہ جس کی لاٹھی اس کی بھینس، وہ ممالک جلد یا بدیر تباہ ہوجاتے ہیں۔ وزیراعظم کا کہنا تھا کہ مدینہ کی فلاحی ریاست میں غریب، بوڑھوں، یتیموں، خواتین کا خیال رکھا جاتا تھا، پنشن کا نظام سب سے پہلے دوسرے خلیفہ راشد حضرت عمرؓ کے دور میں آیا۔ عمران خان نے چین کی تعریف کرتے ہوئے کہا کہ ہم نے چین کی حالیہ ترقی دیکھی جہاں 30 سال میں 70 کروڑ افراد کو غربت سے نکالا گیا، انہوں نے نہ صرف معاشرے میں غریبوں کا خیال رکھا بلکہ 700 وزرا سطح کے افسران کو کرپشن پر جیل میں ڈالا، طاقتور کو قانون کے نیچے لایا گیا، یہ معاشرے کی ترقی کا راز ہے۔