پاکستان میں شوال کا چاند نظر آگیا، باضابطہ اعلان کچھ دیر میں کیا جائیگا

اسلام آباد(پی این آئی)پاکستان میں شوال کا چاند نظر آگیا۔ذرائع کے مطابق شوال کا چاند نظر آنے کی شہادتوں کی تصدیق ہو چکی ہے تاہم باضابطہ اعلان مرکزی رویت ہلال کمیٹی کے چئیرمین کچھ دیر میں کریں گے۔اس سے قبل پشاور کی کمیٹی کو چاند کی رویت کی 32 شہادتیں موصول ہوچکی ہیں ۔جو مرکزی رویت ہلال کمیٹی کو بھجوادی گئی ہیں۔ مرکز کی جانب سے ان شہادتوں کی تصدیق کا عمل جاری ہے۔پشاور کی زونل ہلال کمیٹی کے ذمہ داران کا کہنا ہے کہ انہوں نے شہادتیں مرکزی کمیٹی کو بھجوادی ہیں اور اب وہ مرکز کے فیصلے کا انتظار کر رہے ہیں۔ چاند کی رویت کا اعلان کرنے کے حوالے سے تمام تر ذمہ داری مرکزی رویت ہلال کمیٹی کی ہے۔یہاں یہ بھی واضح رہے کہ عیدالفطر کا چاند دیکھنے کیلئے آج ہونے والا اجلاس پاکستان کی تاریخ کا طویل ترین اجلاس ہوچکا ہے جو پانچ گھنٹے سے زائد وقت سے جاری ہے لیکن پھر بھی چاند کے حوالے سے حتمی فیصلہ نہیں ہوسکا۔ عیدالفطر کا چاند دیکھنے کیلئے رویت ہلال کمیٹی کی تاریخ کا طویل ترین اجلاس اسلام آباد میں جاری ہے جس میں شہادتوں کی تصدیق کی جا رہی ہے۔