پہلا ملک جہاں شوال کا چاند نظر آگیا، عید الفطر کا اعلان کردیا گیا

ٹوکیو (پی این آئی) دنیا کا پہلا ملک جہاں شوال کا چاند نظر آگیا، جاپان میں 30 ویں روزے کے اختتام پر چاند دیکھ لیا گیا، مقامی رویت ہلال کمیٹی نے گزشتہ روز عید الفطر 13 مئی کو ہونے کا اعلان کیا تھا۔ اس سے قبل گزشتہ روز کئی اسلامی ممالک عید الفطر کی تاریخ کا اعلان کر چکے۔ متحدہ عرب امارات میں رمضان المبارک کا 30 ایام کے بعد اختتام ہوگا، عید الفطر 1442 ہجری 13 مئی بروز جمعرات کو منائی جائے گی۔متحدہ عرب امارات میں ملازمت کرنے والے افراد کو عید کے موقع پر ایک ساتھ 5 چھٹیاں مل گئی ہیں۔ امارات میں مقیم شہری 29 رمضان المبارک سے 3 شوال تک 5 تعطیلات سے لطف اندوز ہوں گے۔ قطر اور سعودی عرب کی جانب سے بھی عید الفطر رمضان المبارک کے 30 روزوں کے بعد 13 مئی بروز جمعرات کو منانے کا اعلان کیا گیا ہے۔سعودی حکام کے مطابق مملکت میں میں شوال کا چاند کہیں نظر نہیں آیا، لہذا رمضان المبارک 30 روزوں پر مشتمل ہوگا، جبکہ عید الفطر 13 مئی بروز جمعرات کو ہو گی۔بتایا گیا ہے کہ شوال کا چاند دیکھنے کیلئے بلائے گئے اجلاس کے دوران ہی معروف سعودی ماہر فلکیات نے پیشن گوئی کر دی تھی کہ منگل کے روز سعودی عرب میں شوال کا چاند نظر آنے کے امکانات نہ ہونے کے برابر ہیں۔ اس سے قبل ملائیشیا اور انڈونیشیا عید الفطر کی تاریخ کا اعلان کرنے والے پہلے 2 اسلامی ممالک بن گئے۔ دونوں ممالک میں رویت ہلال کمیٹیوں کے اجلاس میں شوال کا چاند نظر نہیں آیا، جس کے بعد اعلان کیا گیا ہے کہ عید الفطر 13 مئی بروز جمعرات کو ہوگی۔جبکہ آسٹریلیا دنیا کا پہلا ملک تھا جہاں رمضان المبارک کے اختتام سے چند روز قبل ہی رواں سال عید الفطر کی تاریخ کا باضابطہ اعلان کر دیا گیا۔ اس حوالے سے آسٹریلین قومی امام کونسل کی جانب سے باقاعدہ اعلامیہ جاری کیا گیا۔ جاری اعلامیہ میں آسٹریلیا میں مقیم مسلمانوں کو بتایا گیا کہ آسٹریلیا میں عید الفطر 1442 ہجری 13 مئی بروز جمعرات کو منائی جائے گی۔آسٹریلیا میں رمضان المبارک کا اختتام 12 مئی بروز بدھ کو ہو گا، اسی روز شوال کا چاند بھی نظر آ جائے گا، جس کے بعد 13 مئی بروز جمعرات کو آسٹریلیا بھر میں عید الفطر منائی جائے گی۔ آسٹریلیا کے علاوہ دیگر کئی ممالک میں بھی شوال کے چاند کی رویت کے حوالے سے پیشن گوئی کی گئی۔ رمضان المبارک کا آخری ایام میں غیر ملکی ماہرین فلکیات کی جانب سے ایک رپورٹ جاری کی گئی، جس میں شوال کے چاند کی رویت کے حوالے سے تکنیکی معلومات فراہم کی گئیں۔رپورٹ کے مطابق 11 مئی کو دنیا کے کسی ملک میں شوال کا چاند نظر نہیں آئے گا، جبکہ کئی ممالک میں 12 مئی کو بھی چاند نظر آنے کا امکان نہیں ہے۔ سعودی عرب، متحدہ عرب امارات سمیت بیشتر خلیجی اور عرب ممالک کے علاوہ کئی یورپی ممالک میں بھی 12 مئی کو چاند نظر آ جائے گا، یوں ان ممالک میں 13 مئی بروز جمعرات عید الفطر منائی جائے گی۔ جبکہ پاکستان سمیت بیشتر ایشیائی ممالک میں 12 کی بجائے 13 مئی کو شوال کا چاند نظر آئے گا، یوں ان ممالک میں 14 مئی کو عید الفطر منائی جائےگی۔ رپورٹ کے مطابق اس مرتبہ دنیا کے بیشتر ممالک میں رمضان المبارک 30 ایام پر مشتمل ہوگا۔