اسلام آباد( آن لائن )نیشنل کمانڈ اینڈ آپریشن سینٹر کا اجلا س۔دس مئی سے پندرہ مئی تک عید الفطر کی تعطیلات کا اعلان ۔صوبوں کے ملازمین کیلئے عید الفطر کی 8چھٹیاں ہو جائیں گی ۔وفاقی حکومت کے ملازمین کے لیے 9چھٹیاں بنیں گی۔ چاند رات کے بازاروں پر پابندی ہوگی۔، این سی او سی عید کیلئے اضافی ٹرینیں 7مئی تک چلائی جائیں گی ۔ این سی او سی انٹر سٹی ٹرانسپورٹ پر8سے 16مئی تک مکمل پابندی رہیگی۔ این سی او سی عید کی تعطیلات کے دوران بجلی کی بلا تعطل فراہمی یقینی بنائی جائے ۔نیشنل کمانڈ اینڈ کنٹرول آپریشن سینٹر(این سی او سی ) نے ملک بھر میں 8 سے 16 مئی 2021ء کے دوران عوام کی نقل و حرکت روکنے کی حکمت عملی کا اعلان کیا ہے جس میں 10 سے 15 مئی تک عید کی چھٹیوں کا اعلان بھی شامل ہے،این سی او سی نے ملک میں 6 ہزار میٹرک ٹن آکسیجن اور 5 ہزار سلنڈر درآمد کرنے کی منظوری بھی دیدی ہے جبکہ 40-49 سالہ شہریوں کی کورونا ویکسینیشن 3 مئی سے شروع کرنے کا فیصلہ کیا گیاہے ، 5سے 20 مئی تک مسافر پروازوں کی آمد پر پابندی بھی عائد کردی گئی ہے ۔۔تفصیلات کے مطابق وفاقی وزیر اسد عمر کی زیر صدارت این سی سی او سی کا اجلاس ہوا جس میں ملک میں کورونا کی صورتحال اور اس کی روک تھام کیلئے اقدامات کا جائزہ لیا گیا۔مائیکرو بلاگنگ ویب سائٹ ٹوئٹر پر جاری اعلامیہ میں بتایا گیا کہ این سی او سی نے ملک بھر میں 8 سے 16 مئی کے دوران عوام کی نقل و حرکت روکنے کی حکمت عملی کا اعلان کیا ہے جس میں 10 سے 15 مئی تک عید کی چھٹیوں کا اعلان بھی شامل ہے۔ اعلامیہ میں کہا گیا ہے کہ یومِ علی کرمہ اللہ وجہہ، اعتکاف، شب قدر، جمعتہ الوداع اور نماز عید کے لیے جامع ایس او پیز یکم مئی تک جاری کیے جائیں گے۔ فورم نے 3 مئی 2021 سے 40 سے 49 سال کی عمر کے افراد کی ویکسینیشن کا فیصلہ کیا ہے۔ اجلاس میں عالمی سطح پر وائرس کے پھیلاؤ میں اضافے کے پیشِ نظر پاکستان آنے والی مسافر پروازوں کو 5 سے 20 مئی تک روکنے کا فیصلہ کیا گیا ہے۔بعدازاں 18 مئی 2021 کو ان پابندیوں کا دوبارہ جائزہ لیا جائے گا، اس ضمن میں تفصیلی ہدایات سول ایوی ایشن اتھارٹی (سی اے اے) جاری کرے گی۔اجلاس میں ان باؤنڈ پرواز محدود کرنے کا فیصلہ کیا گیا ہے دورانِ اجلاس ملک میں آکسیجن کی پیداوار اور فراہمی کا بھی جائزہ لیا گیا اور 6 ہزار میٹرک ٹن آکسیجن اور 5 ہزار آکسیجن سلینڈرز درآمد کرنے کی اجازت دینے کا بھی فیصلہ کیا گیا تا کہ ملک میں صحت کی سہولیات کو بہتر بنایا جاسکے۔اس کے ساتھ ساتھ صحت کی دیکھ بھال کے لئے آکسیجن کی بہترفراہمی کے لئے مصری شاہ کی اسکریپ انڈسٹری کو بند کرنے کا بھی فیصلہ کیا گیا۔ علاوہ ازیں 20 کرائیوجینک ٹینکس درآمد کرنے کی اجازت بھی دے دی گئی۔این سی او سی نے فیصلہ کیا مصری شاہ کی اسکریپ انڈسٹری کو بند کر کے آکسیجن کو ہیلتھ کیئر سیکٹر کی جانب موڑ دیا جائے گا۔اجلاس میں عید کی چھٹیوں کے دوران ‘گھروں میں رہنے اور محفوظ رہنے’ کی ضرورت پر زور دیا گیا۔اس ضمن میں مارکیٹوں کی بندش(استثنیٰ کے ساتھ)، انٹرسٹی اور انٹرا سٹی پبلک ٹرانسپورٹ اور سیاحت کے حوالے سے جامع رہنما ہدایات متعلقہ وزارتوں کو جاری کردی گئی ہیں۔ اعلامیہ میں کہا گیا ہے کہ پرنٹ، الیکٹرانک اور سوشل میڈیا پر مسلسل لوگوں کو گھروں میں رہنے اور محفوظ رہنے’ کے عنوان سے پیغامات چلائے اور نشر کئے جائیں ۔میڈیاچینلز عید تعطیلات کے دوران خصوصی پیکجز چلائیں تاکہ لوگ گھروں میں رہیں ۔عید تعطیلات کے دوران بلا تعطل بجلی کی فراہمی جاری رہے گی ۔
تازہ ترین خبروں کے لیے پی این آئی کا فیس بک پیج فالو کریں
