سینیٹ الیکشن، وزیراعظم عمران خان نے سینیٹ کی ٹکٹو ں کی تقسیم میں تبدیلی کا عندیہ دیدیا

اسلام آباد(پی این آئی)سینیٹ الیکشن کے حوالے سے وزیراعظم عمران خان نے اختلافات کی خبریں سامنے آنے کے بعد پارٹی کی جانب سےجاری کی گئی ٹکٹوں پر نظرثانی اور تبدیلی کا عندیہ دیدیا۔نجی ٹی وی کے مطابق وزیراعظم عمران خان کی زیرصدارت پاکستان تحریک انصاف کے پارلیمانی بورڈ کا اجلاس ہوا۔نجی

ٹی وی نے ذرائع کے حوا لے سے بتایا کہ اجلاس میں سندھ سے فیصل واوڈا کو سینیٹ کا ٹکٹ دیے جانے پر اراکین پارلیمنٹ بورڈ نے تحفظات کا اظہارکیا۔ذرائع کے مطابق کارکنوں نے کہا کہ فیصل واوڈا نااہلی سے بچنے کیلئے سینیٹر بننا چاہتے ہیں،پارٹی ارکان کے تحفظات کے بعد وزیراعظم نے سینیٹ انتخابات کے لیے دیے گئے ٹکٹوں پر نظرثانی کا فیصلہ کیا ہے اور ٹکٹوں میں تبدیلی کا عندیہ بھی دیا ہے۔ذرائع کے مطابق اجلاس میں وزیراعظم عمران خان نے کہا کہ سینیٹ انتخابات کیلئے پارٹی ٹکٹ میرٹ پر دیں گے، پارٹی کارکنان کی خواہشات کا احترام کرتے ہیں، کسی پیرا شوٹر کو سینیٹر نہیں بنائیں گے۔ذرائع کے مطابق پی ٹی آئی کے پارٹی ٹکٹوں کی تقسیم سے متعلق فیصلہ آئندہ 24 گھنٹوں میں متوقع ہے۔سندھ سے سیف اللہ ابڑو اور فیصل واوڈا، خیبرپختونخوا سے نجیہ اللہ خٹک اور فیصل سلیم سے ٹکٹیں واپس لیے جانے کا امکان ہے۔ وزیراعظم نے کہا کہ چاروں افراد پر پارٹی کارکنوں کے الزامات کی خود تحقیقات کروں گا، کسی پیراشوٹر کو سینیٹر نہیں بنائیں گے۔ پارلیمانی بورڈ کو بریفنگ میں بتایا گیا پارٹی کارکنوں کے تحفظات کے مطابق سیف اللہ ابڑو نیب زدہ ہیں، فیصل واوڈا نااہلی سے بچنے کے لیے سینیٹر بننا چاہتے ہیں، فیصل سلیم پر جعلی سگریٹس بیچنے کا الزام ہے جبکہ نجیہ اللہ خٹک کی پارٹی کے لیے کوئی خدمات ہی نہیں ہیں۔