عوام عمران خان کی حکومت سے پرامید ہے یا مایوس ؟ نئے سال کے آغاز پر عوام کی اکثریت کی رائے آگئی

لاہور(پی این آئی) سال 2020 کا آخری سروے، عوام کی اکثریت عمران خان حکومت کے دوران مستقبل کے حوالے سے پرامید، گیلپ پاکستان کی جانب سے کروائے گئے سروے کے دوران 47 فیصد افراد مستقبل سے مایوس نہیں، 37 پاکستانی مستقبل سے مایوس۔ تفصیلات کے مطابق گیلپ پاکستان کی جانب سے پاکستانیوں کی

رائے جانے کیلئے سال 2020 کے آخری سروے کے نتائج جاری کر دیے گئے ہیں۔سروے کے دوران ملک بھر کے ہزاروں افراد سے ان کی رائے حاصل کی گئی۔ سروے کے دوران لوگوں سے پوچھا گیا کہ آیا موجودہ دور حکومت میں وہ مستقبل کے حوالے سے پرامید ہیں یا نہیں، تو اس سوال کے جواب میں لوگوں کی اکثریت 47 فیصد نے کہا کہ وہ بہتر مستقبل کی امید رکھتے ہیں۔ جبکہ سروے کے دوران 37 فیصد لوگوں نے مستقبل سے مایوسی کا اظہار کیا۔سروے کے دوران 10 فیصد افراد نے کوئی بھی رائے دینے سے گریز کیا۔پاکستانیوں میں پُرامید ہونےکے نیٹ اسکور میں گزشتہ برس کے مقابلے میں اضافہ ہوا ہے۔ گزشتہ برس پاکستانیوں کے پُر امید ہونے کا نیٹ اسکور 14 فیصد پر آگیا تھا جو اب بڑھ کر 17 فیصد ہو گیا ہے۔ تاہم 2018 میں جب تحریک انصاف اقتدار میں آئی تھی، تب یہ اسکو 37 فیصد کی بلند سطح پر تھی۔ اگر آج الیکشن منعقد ہوں تو کون سی پارٹی جیت جائیگی؟ گیلپ سروے کے حیران کن نتائج گیلپ پاکستان کی جانب سے کرائے گئے ایک سروے میں یہ حقیقت سامنے آئی ہے کہ اگر موجودہ سیاسی نشیب و فراز کو دیکھتے ہوئے آج ہی الیکشن منعقد کرا دیئے جائیں تو کونسی پارٹی جیتنے کی پوزیشن میں ہو گی جس کے جواب میں پاکستانیوں کی بڑی تعداد22 فیصد نے اس سوال پر کچھ علم نہ ہونے کا جواب دیا۔اس کے بعد جو سیاسی پارٹی سب سے زیادہ عوام کا اعتماد حاصل کر پائی ان میں پہلے نمبر پر تحریک انصاف ہے جسے 17 فیصد لوگ ووٹ دینا چاہیں گے۔اس کے بعد پیپلزپارٹی اور مسلم لیگ ن ہیں جنہیں 13 فیصد ووٹ دینا مناسب سمجھتے ہیں۔12 فیصد شہریوں نے ایم کیو ایم پاکستان کو ووٹ دینے کا ارادہ ظاہر کیا۔ 4 فیصد لوگوں نے جے یو آئی (ف)جبکہ 3

فیصد لوگوں نے پاک سر زمین پارٹی کو ووٹ دینے کی چاہت کا اظہار کیا۔ ان کے علاوہ 13 فیصد ایسے لوگ تھے جو ان سیاسی پارٹیوں کے علاوہ دیگر کو ووٹ دینا چاہتے تھے۔اس سروے میں 535 افراد کے فیس ٹو فیس انٹرویو کیے گئے اور سروے 27 اکتوبر سے 27 نومبرکے درمیان کیا گیا۔سروے کے مطابق عام انتخابات ہونے کی صورت میں 64 فیصد شہریوں نے ووٹ کاسٹ کرنے کا بھی کہا جبکہ 36 فیصد نے ووٹ دینے سے انکار کر دیا۔ اس کا مطلب ہے کہ الیکشن ہونے کی صورت میں 10 میں سے 6 افراد ووٹ دیں گے۔ کراچی شہر میں منعقد ہونے والے اس سروے میں لوگوں سے بلدیاتی انتخابات اور نمائندوں سے متعلق سوال کیا گیا جس پر عجیب بات سامنے آئی کہ آخری انتخابات میں 43 فیصد لوگوں نے اپنا حق رائے دہی استعمال ہی نہیں کیا تھا۔ جبکہ 23 فیصد لوگوں نے تحریک انصاف کو ووٹ دیا تھا۔ اس کے بعد 9 فیصد لوگوں نے ایم کیوایم پاکستان کو ووٹ دیا تھا۔سروے میں شامل افراد سے موجودہ بلدیاتی حکومت کی کارکردگی سے متعلق سوال پوچھا گیا تو 34 فیصد نے کہا کہ وہ مطمئن ہیں جبکہ 66فیصد لوگ موجودہ بلدیاتی حکومت سے غیر مطمئن نظر آئے۔