کراچی(این این آئی)گھروں کی تعمیر کرنے کیلئے عوام کو سستے قرضے فراہم کرنے کیلئے 6 بینکوں اور پاکستان مورگیج ری فنانس کمپنی کے مابین معاہدہ طے پاگیا۔پاکستان میں گھروں کی تعمیر کیلئے سستے قرضوں کی فراہمی کیلئے ایک اور مرحلہ طے ہوگیا، 6 بینکوں اور پاکستان مورگیج ری فنانس کمپنی کے
درمیان رسک کوریج کا 10 سالہ معاہدہ طے پاگیا۔بینکوں کے ہاسنگ لونز کیلئے 40 فیصد تک کریڈٹ گارنٹی پی ایم آر سی فراہم کرے گی۔ تقریب سے خطاب میں ڈپٹی گورنر سٹیٹ بینک جمیل احمدنے کہاکہ سستے گھروں کی اسکیم کے لیے وزارت خزانہ اور اسٹیٹ بینک مل کر کام کر رہے ہیں۔ اسٹیٹ بینک نے کم قیمت گھروں کے لیے قوانین کو نرم کیا ہے۔اس موقع پر بات کرتے ہوئے ڈپٹی گورنر سٹیٹ بینک جمیل احمد نے کہاکہ اسٹیٹ بینک نے سستے گھروں کے لئے بینکوں کو قرض کی فراہمی کے اہداف دیئے ہیں، جو بینک سستے گھروں کی اسکیم کے اہداف پورے نہیں کریں گے، ان کو جرمانے کا سامنا ہوگا۔ ڈپٹی گورنر اسٹیٹ بینک نے درخواست کی کہ پراسیسنگ کے نام پر کوئی اضافی رقم نہ لی جائے۔انہوں نے کہاکہ ہائوسنگ لونز کے حوالے سے بینکوں کیلئے جزا و سزا کا تصور بھی موجود ہے، جو بینکس قرضے دینے کا ہدف حاصل کریں گے انہیں انعام ملے گا جبکہ ہدف حاصل نہ کرنے پر جرمانے ہوں گے۔انہوں نے کہاکہ شکایت پر کچھ بینکوں کیخلاف کارروائی بھی ہوئی ہے۔پاکستان مورگیج ری فنانس کمپنی کے سی ای او مدثر حسن خان نے تقریب سے خطاب کرتے ہوئے کہاکہ سستی ہائوسنگ اسکیم کو تیزی سے آگے بڑھانا ہے۔ پاکستان میں مورگیج فنانس کا قیام دو سال پہلے عمل میں آیا تھا۔ جس کا مقصد بینکنگ سیکٹر میں طویل المدتی فنڈنگ میں رکاوٹوں
کو دور کرنے اور مناسب قرض کو یقینی بنانا ہے، اس سے کم آمدنی والے طبقے کو سستی مورگیج سہولیات مل سکیں گی۔کریڈٹ رسک گارنٹی ایگریمنٹ کے تحت نجی شعبے کے 5 اور 10 مرلہ کنسٹرکشن منصوبے بھی اس معاہدے سے مستفید ہوسکیں گے۔ توقع ہے آنیوالے دنوں میں ملک کے دیگر بینکس بھی پی ایم آر سی کیساتھ ایسے معاہدے کریں گے۔۔۔۔
تازہ ترین خبروں کے لیے پی این آئی کا فیس بک پیج فالو کریں
