فیضان عشق رسول کے نام سے 1212 مساجد بنانے کا اعلان، اگر وہ ہمارے نبی کی شان میں گستاخی کریں گے، ہم مساجد کی تعداد بڑھادیں گے، نمازی بنائیں گے

کراچی(آئی این پی ) امیر اہلسنت حضرت علامہ مولانا محمد الیاس عطار قادری نے 12 ربیع الاول کی شب عالمی مدنی مرکز فیضان مدینہ میں محفل میلاد میں دشمنان اسلام کی جانب گستاخانہ خاکوں کی اشاعت سے متعلق ایک اہم اعلان کرتے ہوئے فیضان عشق رسول کے نام سے 1212 مساجد بنانے اعلان کردیا۔ امیر

اہلسنت نے کہا کہ گستاخوں نے جو خاکے بنائے اس سے مسلمانوں کے دل چھلنی ہوئے، اللہ ان بد بختوں کو ہدایت دے اور اگر ہدایت نہیں تو انھیں نیست ونابود کردے ،اللہ انھیں تباہ وبرباد کردے اور انھیں نشان عبرت بنادے، امیر اہلسنت نے کہاکہ اللہ کرے سرکار کی محبت ہمارے دل میں رہے، دل میں عشق رسول کی شمع روشن رہے جشن ولادت کے موقع پر سجدہ شکر کریں، کیونکہ ہمیں بہت بڑی نعمت ملی ہے ہمیں جو عزت ملی ہم اس عزت سے لوگوں کو اللہ کی بارگاہ میں جھکائیں، نمازی بنائیں انھیں سنتوں کا پابند بنائیں۔ مولانا محمد الیاس عطار قادری نے کہا کہ گستاخان رسول کے رد میں دعوت اسلامی فیضان عشق رسول مساجد بنائے گی، مساجد بناتے رہیں بڑھاتے رہیں اور انھیں بڑھاتے رہیں، ہم مزید دین کے ساتھ مربوط ہوجائیں گے، اگر وہ ہمارے نبی کی شان میں گستاخی کریں گے تو ہم مساجد کی تعداد بڑھادیں گے نمازی بنائیں گے، امیر اہلسنت نے کہا کہ ہمارے لیے سرکار کی ذات قابل تقلید ہے اور ہمارے لیے بہترین نمونہ ہیں۔۔۔۔