سعودی عرب کی جانب سے اسرائیل کو تسلیم نہ کرنے کا اعلان، پاکستان نے بھی اپنا ردِ عمل دیدیا

اسلام آباد (پی این آئی) وزیر خارجہ مخدوم شاہ محمود قریشی نے کہا ہے کہ سیکولر بھارت کے حامی، بھارت کی ہندوتوا پالیسیوں کے سبب آج سراپا احتجاج ہیں،سعودی عرب کے نائب وزیر خارجہ عادل الجبیر کا فلسطین کے حوالے سے بیان خوش آئند ہے جس نے تمام قیاس آرائیوں کو ختم کر دیا ہے۔ وہ جمعرات کو وزارت

خارجہ میں سابق خارجہ سیکرٹریز کے مشاورتی اجلاس کی صدارت کر رہے تھے۔اجلاس میں بھارتی غیر قانونی مقبوضہ جموں کشمیرمیں جاری بھارتی جارحیت، افغان امن عمل اورخطے میں امن وامان کی صورتحال پرتبادلہ خیال کیا گیا۔ وزیر خارجہ نے کہا کہ بھارتی غیر قانونی مقبوضہ کشمیر کے نہتے شہری گذشتہ ایک سال سے بدترین کرفیو کا سامنا کر رہے ہیں۔ سیکولر بھارت کے حامی،آج بھارت کی ہندوتوا پالیسیوں کے سبب سراپا احتجاج ہیں۔انہوں نے کہا کہ بھارت اپنے داخلی انتشار سے توجہ ہٹانے کیلئے ایل او سی کی مسلسل خلاف ورزیاں کرتے ہوئے معصوم شہریوں کو نشانہ بنا رہا ہے۔ وزیر خارجہ نے شرکا اجلاس کو افغان طالبان کے ساتھ ہونے والی ملاقات اور افغان امن عمل کے حوالے سے اب تک ہونے والی پیش رفت سے بھی آگاہ کیا۔ اجلاس کے دوران متحدہ عرب امارات اور اسرائیل کے مابین طے پانے والے حالیہ معاہدے، اور مشرق وسطیٰ کی صورتحال کو بھی زیر بحث لایا گیا۔وزیر خارجہ نے کہا کہ سعودی عرب کے نائب وزیر خارجہ عادل الجبیر کا فلسطین کے حوالے سے سامنے آنے والا بیان خوش آئند ہے۔سعودی عرب کے فلسطین کے حوالے سے بیان نے میڈیا میں ہونے والی قیاس آرائیوں کو ختم کر دیا ہے۔ وزیر خارجہ نے شرکاء اجلاس کو اپنے حالیہ دورہ چین اور چینی ہم منصب کے ساتھ ہونے والی ملاقات کی تفصیلات سے بھی آگاہ کیا اور کہا کہ پاکستان افغان امن عمل سمیت خطے میں امن و استحکام کیلئے اپنا مخلصانہ کردار ادا کرتا رہے گا۔ سابقہ خارجہ سیکرٹریز نے افغان امن عمل کیلئے پاکستان کی مصالحانہ کوششوں اور کامیاب دورہ چین پر وزیر خارجہ کو مبارکباد پیش کی۔ اجلاس میں اہم خارجہ پالیسی امور پرمشاورتی سلسلے کو تواتر کے ساتھ جاری رکھنے پر اتفاق کیا گیا۔