کراچی (پی این آئی)حکومت پٹرولیم کمپنیوں کے ساتھ بیٹھ کر فوری حل نکالے، عوام کو سزا نہ دی جائے، شہباز شریف کی حکومت پر کڑی تنقید۔پاکستان مسلم لیگ ن کے صدر اور قومی اسمبلی میں اپوزیشن لیڈر میاں محمد شہباز شریف نے ملک میں پٹرولیم مصنوعات کی قلت اورعوام کو در پیش مشکلات پر شدید رد عمل
دیتے ہوئے کہا ہے کہ پٹرول کا بحران حکومتی نظام کے مفلوج ہونے کا ثبوت ہے۔قومی اسمبلی میں اپوزیشن لیڈر کا کہنا تھا کہ حکومت پٹرولیم کمپنیوں کے ساتھ بیٹھ کر فوری حل نکالے، عوام کو سزا نہ دی جائے، پٹرولیم کے شعبے کے ساتھ ڈالر، معیشت اورگیس کے شعبے والی سنگین غلطی دہرائی جارہی ہے۔انہوں نے کہا کہ پٹرولیم مصنوعات کی قیمتوں میں تاریخی کمی کے باوجود حکومت عوام کو ریلیف نہیں دے سکی، عوام حیران ہے کہ دنیا میں تیل کی قیمتیں منفی میں جا چکی ہیں لیکن پاکستان میں تیل نایاب ہوچکا ہے۔صدر مسلم لیگ کا کہنا تھا کہ کوروناکے سبب ایک دوسرے سے فاصلے پر رہنے کی ضرورت کے دوران پٹرول کی قلت نے ہرجگہ عوام کے ہجوم لگا دئیے ہیں، حکومت کی بدانتظامی اور نااہلی کا طوطی سر چڑھ کر بول رہا ہے۔شہباز شریف کا کہنا تھا کہ وزیراعظم پرائیویٹ کمپنیوں کو تیل کی قیمتوں میں کمی کا فائدہ عوام کو دینے کی تلقین کر رہے ہیں لیکن خود اس پر عمل نہیں کر رہے، تیل کی قیمتوں میں تاریخی کمی کا فائدہ بجلی کی قیمتوں میں کمی کرکے عوام کو منتقل کیوں نہیں کیاگیا؟ تیل کی قیمتوں میں تاریخی کمی کا فائدہ گیس کی قیمتوں میں کمی کرکے عوام کو منتقل کیوں نہیں کیاگیا؟۔
تازہ ترین خبروں کے لیے پی این آئی کا فیس بک پیج فالو کریں
