ایک ساتھ 3 لڑکیوں سے شادی، ویڈیو وائرل ہو گئی

اکثر لوگ ایک سے زائد شادیاں کرکے دو یا تین بیویوں کے ساتھ رہتے ہیں اوریہ شادیاں مختلف اوقات میں کرتے ہیں لیکن مصری نوجوان نے ایک ساتھ تین لڑکیوں سے شادی کرکے سب کو حیران کردیا۔

العربیہ اردو پر مصر کے فیوم گورنریٹ کے شہری کی انوکھی شادی کی رپورٹ شیئر کی گئی ہے، مصری نوجوان کی تینوں بیویوں کا نام اسما، بوسی اور امیرہ ہے جن کا کہنا ہے کہ انہیں اس شادی پر کوئی اعتراض نہیں۔شادی کیلئے دُلہا نے جہاں ایک ہی تقریب کا انعقاد کیا وہیں تینوں دُلہنوں کے عروسی سنگھار کیلئے بھی ایک ہی سلون کا انتخاب کیا گیا۔اس انوکھی شادی کی ویڈیو سوشل میڈیا پر شیئر بھی کی گئی ہے جس میں مصری دُلہا کی تینوں دُلہنوں کو سفید عروسی لباس میں دیکھا جاسکتا ہے۔

رپورٹ کے مطابق نوجوان نے تینوں دُلہنوں کو شادی کیلئے راضی کرنے سے متعلق بتایا کہ’ میری تینوں لڑکیوں سے محبت کی شادی ہے جس کیلئے میں نے بذات خود ان لڑکیوں کو راضی کیا، امیرہ میری پڑوسی اور پہلی محبت ہیں جس کے بعد مجھے بوسی اور پھر اسما سے بھی محبت ہوگئی، پھر میں نے تینوں کو ایک ساتھ شادی کیلئے راضی کرلیا‘۔