بھارتی ریاست مغربی بنگال میں نپاہ وائرس کے پھیلاؤ کے بعد ہائی الرٹ جاری کر دیا گیا ہے۔
برطانوی میڈیا کے مطابق مغربی بنگال میں نپاہ وائرس کے کیسز کی اطلاعات سامنے آنے کے بعد مقامی انتظامیہ نے حفاظتی اقدامات مزید سخت کر دیے ہیں، جس کے تحت تقریباً 100 افراد کو گھروں میں قرنطینہ کر دیا گیا ہے، جبکہ ایک مریض کی حالت تشویشناک بتائی جا رہی ہے۔
رپورٹ کے مطابق صورتحال کے پیش نظر تھائی لینڈ نے بھی احتیاطی تدابیر بڑھا دی ہیں اور مغربی بنگال سے آنے والے مسافروں کے لیے بڑے ہوائی اڈوں پر متعدی امراض کی اسکریننگ شروع کر دی گئی ہے۔
واضح رہے کہ نپاہ وائرس پہلی بار 1998 میں ملائیشیا میں سامنے آیا تھا، جبکہ عالمی ادارہ صحت کے مطابق یہ ایک خطرناک زونوٹک وائرس ہے جو بنیادی طور پر چمگادڑوں کے ذریعے پھیلتا ہے۔
ماہرین کے مطابق نپاہ وائرس کے لیے تاحال کوئی مخصوص علاج یا منظور شدہ ویکسین دستیاب نہیں، جس کے باعث حکام نے عوام کو احتیاطی تدابیر اختیار کرنے کی ہدایت کی ہے۔
تازہ ترین خبروں کے لیے پی این آئی کا فیس بک پیج فالو کریں
