سونا مہنگا، فی تولہ کتنے کا ہو گیا؟

کراچی: ملک بھر میں سونے کی قیمتوں میں ایک بار پھر نمایاں اضافہ ریکارڈ کیا گیا ہے، جس نے خریداروں اور سرمایہ کاروں کو چونکا دیا ہے۔

آل پاکستان جیمز اینڈ جیولرز ایسوسی ایشن کے مطابق فی تولہ سونے کی قیمت میں 1300 روپے کا اضافہ ہوا ہے، جس کے بعد نئی قیمت 4 لاکھ 56 ہزار 162 روپے تک پہنچ گئی ہے۔ اسی طرح 10 گرام سونا 1115 روپے مہنگا ہو کر 3 لاکھ 91 ہزار 85 روپے میں فروخت ہو رہا ہے۔ دوسری جانب عالمی منڈی میں بھی سونے کی قیمت میں اضافہ دیکھا گیا، جہاں سونا 13 ڈالر بڑھ کر 4338 ڈالر فی اونس ہو گیا ہے۔

واضح رہے کہ اس سے ایک روز قبل ملک بھر میں فی تولہ سونے کی قیمت میں 900 روپے کی کمی ریکارڈ کی گئی تھی، جس کے بعد اچانک اضافے نے مارکیٹ میں نئی بحث چھیڑ دی ہے۔ ماہرین کے مطابق عالمی سطح پر ڈالر کی قدر میں بہتری اور سرمایہ کاروں کی جانب سے منافع کے حصول کے رجحان کے باعث سونے کی قیمتوں میں اتار چڑھاؤ دیکھنے میں آ رہا ہے۔

یاد رہے کہ سونا روایتی طور پر محفوظ سرمایہ کاری تصور کیا جاتا ہے، جس کی قیمت افراطِ زر، سیاسی بے یقینی اور معاشی عدم استحکام کے دوران بڑھ جاتی ہے۔ صدیوں سے سونا دولت اور کرنسی کی علامت رہا ہے اور جب دیگر اثاثے غیر یقینی کا شکار ہوں تو سرمایہ کار عموماً سونے کا رخ کرتے ہیں۔ واضح رہے کہ پاکستان میں گزشتہ برس سونے کی قیمتوں کے تعین کے طریقۂ کار میں تبدیلی کی گئی تھی، جس کے تحت مقامی قیمت کو عالمی مارکیٹ ریٹ سے 20 ڈالر فی اونس زیادہ مقرر کیا جاتا ہے۔