ملکی معاشی صورت حال سے متعلق وزارت خزانہ کی آؤٹ لک رپورٹ جاری

ملکی معاشی صورت حال کے حوالے سے وزارت خزانہ نے آؤٹ لک رپورٹ جاری کردی ہے۔ رپورٹ کے مطابق نومبر کے دوران مہنگائی کی شرح پانچ سے چھ فیصد کے درمیان رہنے کا تخمینہ ہے جبکہ پاکستان کی مجموعی معاشی صورتحال محتاط انداز میں مثبت دکھائی دے رہی ہے۔ خوراک کی قیمتوں اور زرعی پیداوار پر دباؤ موجود ہے، تاہم صنعتی سرگرمیوں میں بتدریج بہتری جاری ہے۔

وزارت خزانہ کی جانب سے جاری کردہ ماہانہ معاشی آؤٹ لک میں کہا گیا ہے کہ معاشی اصلاحات کے نفاذ سے اقتصادی سرگرمیوں میں استحکام پیدا ہوا ہے۔ رپورٹ کے مطابق فصلوں کا مجموعی منظرنامہ ملا جلا ہے لیکن مناسب زرعی ان پٹس کی دستیابی سے حالات بہتر ہونے کی توقع کی جارہی ہے۔

رپورٹ میں کہا گیا ہے کہ حکومتی معاون اقدامات سے سپلائی میں بہتری کا امکان ہے اور ربیع سیزن میں زرعی سپلائی میں استحکام متوقع ہے۔ وزارت خزانہ نے یہ بھی بتایا ہے کہ معیشت بتدریج استحکام کی طرف بڑھ رہی ہے اور ساختی اصلاحات کے عملی نتائج سامنے آرہے ہیں جبکہ مالی نظم و ضبط میں بہتری اور محصولات میں اضافہ ریکارڈ کیا گیا ہے۔

آؤٹ لک رپورٹ میں مزید کہا گیا ہے کہ حکومتی اخراجات میں محتاط حکمتِ عملی برقرار رکھی جائے گی۔ رپورٹ کے مطابق ترسیلات زر میں اضافہ ہو رہا ہے اور معاشی صورتحال مزید مستحکم محسوس ہو رہی ہے۔

وزارت خزانہ نے بتایا ہے کہ ایل ایس ایم سیکٹر اور آئی ٹی برآمدات میں اضافہ ریکارڈ کیا گیا ہے جبکہ عوامی قرضہ 1371 ارب روپے کم ہوا ہے۔ رپورٹ میں یہ بھی کہا گیا ہے کہ پانچ سال بعد پہلی بار کسی ایک سہ ماہی میں قرض میں نمایاں کمی واقع ہوئی ہے اور مہنگے قرضوں کی قبل از وقت ادائیگی سے مالی خطرات کم ہونے کا امکان ہے۔ رپورٹ کے مطابق اقتصادی استحکام کے لیے حکومت کی حکمت عملی مؤثر ثابت ہو رہی ہے۔